روس و پاکستان نا تعلقداریک سرسہبی اٹ شون ہلنگ اٹی ءُ،صدر ولادیمیر پیوٹن

اسلام آباد، روس انا صدر ولادیمیر پیوٹن پاکستان نا یومِ آزادی نا وخت آ صدر مملکت آصف علی زرداری و وزیراعظم محمد شہباز شریف نا پن کلہو تیٹی پاکستانی سرکڑدہ و الس ءِ مبارکبادی تسنے۔ روسی صدر پاکستانی الس کن امن، شونہالی و نیک استخواہی تا درشانی ءِ کرسا پارے کہ روس و پاکستان نا تعلقداریک سرسہبی اٹ شون ہلنگ اٹی ءُ۔ ولادیمیر پیوٹن پارے کہ ہڑتوم آ ملک آک سیاسی، واپاری‘ زرگزرانی، انسانی ہمدردی و ایلو بشخ آتیٹی بھرم تروک کمکاری ءِ برجا تخانو وخت اس کہ اہم علاقائی و جہانی باندات آ ہم تین پہ تینی کمکاری برجا ءِ۔ روسی صدر دا پت انا درشانی ءِ کرے کہ روس و پاکستان تینا الس نا فائدہ ٹی ہڑتوم آ کنڈانا شریداری نا کل بشخ آتے پین سوگو کیرہ۔ داکان بیدس ایران نا صدر مسعود پزشکیان پاکستان نا یومِ آزادی نا وخت آ تینا کلہو اٹی پارے کہ ایران و پاکستان نا اسیجائی فائدہ غاک مہالو آن بھاز زیات گنڈوک ءُ۔ تینا بیان اٹی ایرانی صدر پارے کہ پاکستان نا عظیم آ قوم انا سرسہبی تے خراجِ عقیدت پیش کننگ کن یومِ آزادی اسہ نہادی ءُ وارخواہی اسے، پاکستان نا یومِ آزادی ایران پاکستان مدامگی و اسٹریٹجک تعلقداری تے پین کڑمب و زیات کننگ نا پوسکن ءُ وڑ اسے۔ ایرانی صدر پارے کہ ایران پاکستان تون تعلقداری تے پین سوگو کننگ نا عزم آ سلوک ءِ۔ تین پہ تینی پت و شرف و ساڑی لائخی تیان فائدہ ہرفسا ہڑتوم آ کنڈانا تعلقداری تے سوگو کننگ کن پین بھرمی گام گیج کننگ کن تیار ءِ۔