5 اگست سویلی ایشیا نا تاریخ نا بھاز است ہسون ءُ دے اسے،ڈپٹی کمشنر کچھی

ڈپٹی کمشنر کچھی ممتاز کھیتران نا کماشی ٹی 5 اگست یومِ استحصالِ کشمیر نا وخت آ ریلی ٹی کشمیری الس تون پورو یکجہتی نا درشانی ءِ کننگا۔ سرجم حوال آتا رِد اٹ 5 اگست یومِ استحصالِ کشمیر نا وخت آ ضلعی انتظامیہ کچھی نا کنڈ آن ڈپٹی کمشنر کچھی ممتاز کھیتران نا کماشی ٹی ضلعی ہیڈکوارٹر ڈھاڈر اٹی اسہ ریلی اس اڈ تننگا۔ ریلی ٹی جتا جتا سرکاری محکمہ غاتا افسر، کارندہ، استاد، طالب علم‘ پولیس، ریسکیو کارندہ‘ سول سوسائٹی نا نمائندہ، راجی شخصیت و شاری تا بھلو کچ اس بشخ ہلک۔ ریلی نا بنا ڈپٹی کمشنر آفس آن مس، ہراکان شریدار آک جتا جتا شاہراہ تیان گدرینگسا تینا پن کروک ہند اسکان سرمسر۔ شریدار آک دو تیٹی قومی بیرک‘ کشمیری الس تون یکجہتی نا درشانی نا بینر و پلے کارڈ ہرفیسر۔ ہرافتیا “کشمیر جوڑ مریک پاکستان‘ نن کشمیری الس تون اوار اُن“حقِ خودارادیت کشمیری تا بنداوی حق ءِ‘ و بھارتی بیدادی نا برخلاف نعرہ غاک نوشتہ ئسر۔ ریلی نا وخت آ شریدار آک پرامن وڑ اٹ کشمیری الس تون پورو یکجہتی نا درشانی ءِ کریر۔ دا وخت آ ڈپٹی کمشنر کچھی ممتاز کھیتران تران کرسا پارے کہ 5 اگست 2019 سویلی ایشیا نا تاریخ نا اسہ است ہسون ءُ دے اسے، ہراتم بھارت مقبوضہ جموں و کشمیر نا خصوصی آئینی حیثیت ءِ تینا خود آن چٹفسا جہانی کانود و اقوامِ متحدہ نا قرارداد آتا خلاف ورزی ءِ کرے۔ او پارے کہ کشمیری الس کیہی دہائی تیان تینا بنداوی حق، حقِ خودارادیت نا دوئی کننگ کن بے مٹ قربانی تننگ اٹی ءُ، و پاکستان نا حکومت و الس مدام اوفتتون ہم کوپہ سلوک ءِ۔ او پارے کہ یومِ استحصالِ کشمیر اڈ تننگ نا مسخت جہانی برادری نا چکار ءِ مقبوضہ کشمیر اٹی برجا انسانی حق آتا بھلا خلاف ورزی، بیداد و جبر و کشمیری الس نا خواری تا کنڈ آ دننگ ءِ۔ او دا عزم انا درشانی ءِ کرے کہ پاکستان کشمیری الس نا سیاسی، سفارتی و اخلاقی مخ تفی ءِ ہر کہول آ برجا تخک و اوفتا روا انگا جہد ءِ ہچ گہس تنیا الیپک۔ ریلی نا شریدار آک دا عزم انا درشانی ءِ کریر کہ پاکستانی قوم تینا کشمیری ایلم تا قربانی تے سلام پیش کیک و اوفتا حقِ خودارادیت نا پورو مخ تفی ءِ برجا تخک۔ ریلی نا اخیر اٹ پاکستان نا سلامتی، شونہالی، قومی سیوت، پاک فوج انا سرسہبی و مقبوضہ کشمیر نا زُوت آجوئی کن خصوصی دعا ہم کننگا۔ دود انا اخیر اٹ ڈپٹی کمشنر کچھی ممتاز کھیتران کل شریدار آتا منت واری ءِ ہرفسا پارے کہ دا وڑ انا قومی دے ننے تینا کشمیری ایلم تتون یکجہتی نا عزم ءِ پین سوگو کننگ نا وارخواہی فراوان کیک و مچ آ قوم کشمیر کاز آ اسٹ ءِ۔ ڈھاڈر بولان (نامہ نگارسمیع اللہ جلبانی)