کشمیری الس ناویل آتا ایسری کن وس انا کچ آ گام گیج کننگک،ڈپٹی چیئرمین سینٹ

ڈپٹی چیئرمین سینیٹ سیدال خان ناصر پارینے کہ بلوچستان اٹ آباد کشمیری الس نا صوبہ نا شونداری و شونہالی کن خذمت آک کس آن اودیم افس۔ کشمیری الس نا مون ءِ مون تروک ویل آتا ایسری کن وس انا کچ آ گام گیج کننگک۔ بلوچستان ننا کل انا اسیجا اُراءِ ہرانا شونداری و شونہالی کن ننے اواری اٹ کاریم کروئی مریک۔ دا ہیت ءِ او جمعہ نادے آ کوئٹہ ٹی اوڑدہی کروک چندی ڈل آتتون ہیت و گپ کرسا کرے۔ ڈل آتیٹی بلوچستان اٹ ہنکینی کشمیریک ہم اوار ئسر۔ ڈل آتیٹی طارق بٹ ایڈووکیٹ، جاوید احمد خان، جہانگیر خان خروٹی، سمیرا خان، میر زمان لہڑی، میر لیاقت، لیاقت راجپوت و ایلوفک اوار ئسر۔ اوڑدہی تا وخت آ ملک انا جم سیاسی حالیت، صوبہ ٹی برجا بنجائی شونداری ڈٹ آتون اوار ایلو باندات آتیا گپ وتران کننگا۔ ڈل آک ڈپٹی چیئرمین سینٹ سیدال خان ناصر ءِ الس ءِ مون تروک ویل آتا بابت سرجم حوال تسر ہراڑا ڈپٹی چیئرمین ویل آتے ایسر کننگ نا باوری کرفے۔ ڈپٹی چیئرمین سینٹ سیدال خان ناصر پارے کہ پاکستان مدام کشمیری الس نا وتواجہی نا حق انا پورو مخ تفی کرینے و کشمیری تیا بھارتی بیدادی تا پاش آن پاش مذمت ءِ کرینے، او پارے کہ پاکستان کشمیری الس نا مخ تفی ءِ آخبت ہم برجا تخک۔ او پارے کہ بلوچستان اٹ پیڑی تیان کشمیریک ایلم تا وڑ رہینگ انگ ءُ و صوبہ نا شونداری و شونہالی کن اوفتا خذمت آک کس آن اودیم افس۔ بلوچستان داڑے آباد کل قوم تا اسیجا اُراءِ ہرا نا شونداری و شونہالی ننا کل انا زمواری ءِ۔ کوئٹہ تون اوار بلوچستان نا ایلو علاقہ غاتیٹی آباد کشمیری الس ءِ مون تروک ویل آتے ایسر کننگ کن وس انا کچ آ کوشست کننگک۔ اوڑدہی نا وخت آ ڈپٹی چیئرمین سینٹ نا کوآرڈینیٹر آک ڈپٹی چیئرمین سینٹ سیدال خان ناصر ءِ تینا اسہ تُو انا کارکڑد و صوبہ نا الس نا ویل آتا ایسر کننگ نا بابت سرجم حوال تسر۔ سیدال خان ناصر پارے کہ الس تون حالی حوالی مننگ کن او کوآرڈینیٹرتعینات کرینے تانکہ او الس نا ویل آتے معلوم کرسا کنے اسکان سرکیر و دا ویل آتا ایسر کننگ کن عملی گام گیج کننگ مرے۔ او پارے کہ مسلم لیگ (ن) نا سروک میاں محمد نواز شریف و وزیراعظم پاکستان میاں محمد شہباز شریف بلوچستان نا شونداری ٹی خاص است خواہی تخرہ و او صوبہ ٹی شونداری کاریم تیکن بھلو زر اس بجٹ اٹ جتا کرینو، شونداری کاریم تا پوروی آن الس ءِ بنداوی آسراتی تا فراوانی ٹی کمک رسینگک۔ او پارے کہ کوآرڈینیٹرزو ڈل آک ہرا ویل آتا نشاندہی کرینو اوفتے ایسر کننگ کن وس انا کچ آ گام گیج کننگک۔