رند پینل نا خواست آ ڈھاڈر، مچھ و بھاگ اٹ شٹر ڈاؤن ہڑتال

ڈسٹرکٹ چیئرمین کچھی سردارزادہ میر بیبرگ خان رند انا کال آ ضلع کچھی نا صدر مقام ڈھاڈر تون اوار مچھ و بھاگ شار اٹی پورو شٹر ڈاؤن ہڑتال کننگا، ہڑتال نا وخت آ مچ آ ضلع نا شار انا کل چنکا بھلا واپاری ہند‘ دکانک پورو وڑ اٹ بند ئسر وخت اس کہ ہڑدے ئی زند ہم زہمی مس۔ شٹر ڈاؤن ہڑتال نا خواست محکمہ لوکل گورنمنٹ کچھی نا اسسٹنٹ ڈائریکٹر لوکل گورنمنٹ کچھی نا ٹینڈرنگ پالیسی و شونداری ڈٹ آتا ٹینڈر آتا عمل اٹی گمانی بے ضابطگی، پیپرا رولز و ایلو قاعدہ وضابطہ غاتا خلاف ورزی، شفافیت نا تنکی و است پسند ٹھیکیدار آتے فائدہ تننگ نا برخلاف کننگاسس۔ شٹر ڈاؤن ہڑتال نا وخت آ رند پینل نا راہشون تا موقف ئس کہ ٹینڈرنگ نا عمل اٹی میرٹ و کانودی خواست آتے گوجالنگا ہرانا شفاف جاست پاست کرسا زموار آتا برخلاف کارروائی کننگے۔ اوفک خواست کریر کہ شونداری ڈٹ آتا ٹینڈر آک پورو شفافیت اٹ اولسر جاری کننگر تانکہ السی وسیلہ غاتا شفاف وڑ اٹ کاریم اٹ اتنگ ءِ پک کننگ مرے۔ ایلو کنڈ آ لوکل گورنمنٹ کچھی نا اسسٹنٹ ڈائریکٹر قاضی سکندر حیات رند پینل کچھی نا کل دوبہ غاتے مسترد کرسا تینا موقف اٹی پارینے کہ دا پینل نا بیدادی و دھڑکو تیان نزور مفرہ۔ ٹینڈرنگ پالیسی پورو وڑ اٹ ادارہ نا پالیسی نا رِد اٹ پک کروک وخت آ اونا ساڑی گری ٹی اوپن کننگانے۔  بولان، ڈھاڈر (نامہ نگار سمیع اللہ جلبانی)