کانود نا رکھوک آتیا جلہو ریاست نا رِٹ آ جلہو تکنگک، شاہد رند

کمکار وزیراعلیٰ بلوچستان حوالکاری و سیاسی باندات شاہد رند مستونگ اٹی دہشت گرد آتا سم کاری آن سیشن جج عبدالحکیم کاکڑ و اونا گن مین نا شہید مننگ نا است ہسون کروک واقعہ نا سخت انگا لوز آتیٹی مذمت ءِ کرسا پارینے کہ کانود نا رکھوک آتیا جلہو اصل ریاست نا رِٹ و نظامِ انصاف ءِ چیلنج کننگ نا اسہ بے سہب ءُ کوشست اسے، ہرادے ہچ گہس سرسہب مننگ کن النپک۔ شاہد رند پارے کہ وکیل و جج آتے شست کننگ اسہ بھلو و منظم ءُ سازش اسے نا بشخ اسے ہرانا مسخت بلوچستان اٹی خلیس و بھیم تالان کننگ و ریاستی ادارہ غاتیا زور شاغنگ ءِ‘ ولے حکومت دا وڑ انا کل پراگندہ ارادہ غاتے بے سہب کننگ کن سنبرینگوک ءِ۔ او پارے کہ دا دہشت گردی نا جلہو نا زموار و اوفتا کمکار آتے ہچ بشخنگپک۔ کانود نافذ کروک ادارہ غاتے دہشت گرد آتا برخلاف فیصلہ کن کارروائی نا پارت کننگانے و زموار آتے کانود نا مون آ سلفسا ایسر اسکان سر کننگک۔