وزیراعظم نا ورنا تے کن گام اس،یوتھ بزنس و ایگریکلچر لون اسکیم نا رد اٹ وام تا کچ 75 لکھ آن ودفسا دونیم کروڑ روپئی کننگا

اسلام آباد، وزیراعظم محمد شہباز شریف وزیراعظم یوتھ بزنس لون اسکیم و وزیراعظم یوتھ ایگریکلچر لون اسکیم نا رد اٹ ورناتے فراوان کروک وام تا کچ 75 لکھ روپئی آن ودفسا دونیم کروڑ روپئی کرینے، وخت اس کہ وام تا دوئی کننگ کن کم آن کم وئیءِ 21 سال آن کم کرسا 18 سال پک کننگ نا پارت کرینے۔ وزیراعظم اسکیم نا رد اٹ نیاڑی تیکن 30 درسد وام جتا کننگ نا پرمان ہم کرینے‘ وزیراعظم محمد شہباز شریف نا کماشی ٹی وزیراعظم یوتھ بزنس و ایگریکلچر لون اسکیم آتیا عملدرآمد و ورنا تے وام تا فراوانی نا جاچ ءِ ہلنگ کن اہم ءُ دیوان اس اڈ ہلک، ہراٹی ورناتے کاروبار نا وارخواہی فراوان کننگ، کشاری بشخ اٹی اوفتا اواری ءِ ودفنگ و مالی کمک نا نظام ءِ پین گچین جوڑ کننگ نا گام گیج آتیا سجفنگا۔ دیوان اٹی وزیراعظم پارت کرے کہ ورنا تے کاروباری و کشاری سرجز آتا شون کن آسان قسط آتیا دونیم کروڑ روپئی اسکان وام فراوان کننگے تاکہ او تینا کاروبار بنا کننگ و ساڑی کاروباری سرجز آتے ودفنگ نا وڑ اٹ مریر۔ وزیراعظم پارے کہ ورناک پاکستان نا نہادی میرات ءُ۔ حکومت اوفتے واکدار جوڑ کننگ، اوفتا لائخی تیان فائدہ ہرفنگ و شرفمندی و پیداواری روزگار نا وارخواہی فراوان کننگ کن سنبرینگوک ءِ۔ ورناتے زرگزرانی وڑ اٹ وتواجہ جوڑ کننگ کن کاروباری و کشاری بشخ آتیٹی زیات آن زیات وارخواہی فراوان کننگ حکومت نا اولیت آتیٹی اوار ءِ۔ او پارت کرے کہ وام تا فراوانی نا پروگرام اٹی نیاڑی تیکن 30 درسد بشخ جتا کننگے تاکہ نیاڑی تے زرگزرانی وڑ اٹ وتواجہ جوڑ کننگ، کاروباری سرجز آتیٹی اوفتا اواری ءِ ودفنگ و اوفتے تینا نت تیا سلفنگ نا وارخواہی فراوان کننگ مریر۔ وزیراعظم ورنا تیکن وام دوئی کننگ نا کم آن کم وئی ءِ 21 سال آن کم کرسا 18 سال کننگ نا ہم پارت کرے تاکہ ورناک عملی زند انا بنائی ریسہ ٹی کاروبار بنا کننگ کیر و کشاری بشخ اٹی تینا لائخی تے کاریم اٹ اتیر۔ دیوان اٹی وزیراعظم سمال اینڈ میڈیم انٹرپرائزز ڈویلپمنٹ اتھارٹی (سمیڈا) ءِ پارت کرے کہ ورنا تے کاروبار بنا کننگ آن ہلیس اونا سرسہب پوروی اسکان وس انا کچ آ کمکاری فراوان کننگے۔ دا رد اٹ کاروباری راہشونی‘ سلابت‘ ڈٹ بندی و ٹیکنیکی کمکاری نا گچین بست و بند کننگے تاکہ وام دوئی کروک آ ورناک تینا کاروبار ءِ سرسہبی اٹ چلیفنگ کیر۔ وزیراعظم تعلقدار کمامدار آتے مچ آ ملک انا کہول آ سُج پام مہم چلیفنگ نا ہم پارت کرے تاکہ ورناتے دا اسکیم، وام تا دوئی کننگ نا وڑوڈول و دوئی آسراتی تیاں آگاہ کننگ مرے و زیات آن زیات ورناک حکومتی پروگرام تیاں فائدہ ہرفنگ کیر۔ دیوان ءِ بریفنگ اٹی پاننگا کہ جنوری 2023ء آن داسکان 5 لکھ 81 ہزار 341 ورناتے وام فراوان کننگانے، ہرا تدوک آ دہ سال نا مون اٹ دہ کچ زیات ءُ۔