علامہ اقبال نا کلہو جہد و روحانی آجوئی نا کمک اٹ تقدیر بدل کننگ ہیل ایتک،صدر مملکت/ وزیراعظم

اسلام آباد، وزیراعظم محمد شہباز شریف شاعرِ مشرق علامہ محمد اقبالؒ نا 149می ودی دے آ اودے خراجِ عقیدت پیش کرسا پارینے کہ علامہ اقبال برصغیر نا مسلمان تے ٹی سیاسی شعور بیدار کرے و اوفتے تینا جتا انگا قومی پجار نا احساس کرفے، ہرا آجوئی نا جہد اٹی اہم کڑد ادا کرے۔ یومِ اقبال، 9 نومبر 2026ء نا وخت آ تینا کلہو اٹی وزیراعظم پارے کہ علامہ اقبال بڑزکو اوصاف نا حامل شخصیت و بھلو فلسفی و مدبر اس ئس، ہرانا فکر آک ورناتے و بروک آ نسل تا فکری ردوم نا وسیلہ ءُ۔ مفکرِ اسلام نا حیثیت اٹ او اسلامی تعلیمات نا فکری پالو تیا گپ و تران کرے، وخت اس کہ اونا اسلامی فکر آک مسلمان تے عملی زند اٹی راہشونی فراوان کیرہ۔ وزیراعظم پڑو کرے کہ حکومت علامہ اقبال نا ودی مننگ نا 150می سال دے انا دود آتا بناءِ کننگ اٹی ءِ، ہرا 9 نومبر 2027ء اسکان برجا سلرہ۔ دا رد اٹ قومی و جہانی کہول آ مچ آ سال خصوصی دود اڈ تننگک‘ ہرافتے ٹی جہانی کانفرنس، علمی و پٹ وپولی مذاکرہ، ادبی میلہ، نمائش، تعلیمی گو و ربیدہ ئی ثقافتی سرجز آک اوار مریرہ‘ داکان بیدس صدر مملکت آصف علی زرداری شاعرِ مشرق ڈاکٹر علامہ محمد اقبالؒ نا 149می ودی دے آ اودے خراجِ عقیدت پیش کرسا پارینے کہ اقبال نا کلام برصغیر نا مسلمان آتے تینا عزت، حق و تینا آخبت نا فیصلہ ءِ تینٹ کننگ نا طاقت نا احساس کرفے۔ اونا شاعری آجوئی، بریبری و شرفمند زند انا دوئی کننگ نا جہد انا کلہو ایتک، ہرا مچ آ انسانیت کن اہمیت تخک۔ تینا کلہو اٹی صدر مملکت پارے کہ علامہ اقبال ہندن ءُ راج اسے نا تغ ءِ خناسس ہراڑے مال و مڈی، آسراتی و خاہوتی حیثیت انسان اسے نا شرف یا اودے رسینگوک وارخواہی تے پک کپ‘ اونا شاعری استحصال نا برخلاف توار چست کرے، غریب آتے اوفتا حق و ہند انا احساس ترفے و پوریاگر تپہ نا عزت و شرف ءِ اہمیت تس۔ آصف علی زرداری پارے کہ اقبال نا بریبری آ تالان راج انا تصور ننے آن خواست کیک کہ ہندن ءُ پاکستان اس ٹہیفنگے ہراڑے مزور ءِ اونا خواری نا پورو بدل رسینگے‘ کشارگر تینا خواری نا بھرم دوئی کے و ہر چنا ءِ خاہوتی حالیت، جنس یا مذہب آن ایڑتر تعلیم و مونی ہننگ نا بریبر وارخواہیک دوئی مریر۔ صدر مملکت نا رِد اٹ علامہ اقبال نا دا تصور نا بنداو فلسفہ خودی ءِ، ہرانا مسخت تینا ذات آ پت، زند انا پاش مسخت و زمواری نا احساس ءِ شون تننگ ءِ۔ خودی علم، خواری، حوصلہ و سوگو کڑدار اٹ شون ہلیک۔ ہرا بندغ تینا عزت و شرف انا احساس تخک، اودے ایلوفتا ہم شرف ءِ کروئی تمک، ہندا اصول قوم تیا ہم لاگو مریک۔ او پارے کہ قومی خودداری نا خواست ءِ کہ پاکستان آجوئی اٹ فیصلہ کننگ نا لائخی تخے، تینا لائخی تے شون ایتے و ایلو قوم آتتون بریبری و تین پہ تینی شرف انا بنداو آ تعلقداری جوڑ کے۔