راجی خذمت نا فراوانی کن غیر سرکاری تنظیم آتا کڑد ءِ شرف ایتنہ ، کمشنر لورالائی ڈویژن

کمشنر لورالائی ڈویژن ولی محمد بڑیچ نا کماشی ٹی جہانی و ہندی غیر سرکاری تنظیم آتا نیام اٹی اسہ اہم ءُ رابطہ دیوان اس کمشنر آفس لورالائی ٹی اڈ ہلک۔ دیوان نا مسخت مچ آ ڈویژن ٹی برجا و سلاہی شونداری، آسودہی و  انسانی ہمدردی نا ڈٹ آتا جاچ ءِ ہلنگا، ضلعی انتظامیہ و کمکی ادارہ غاتا نیام اٹی تین پہ تینی کمک ءِ پین بھرمی جوڑ کننگ و الس ءِ تننگوک خذمت آتا آب ءِ جوانی نا کنڈ آ دننگ ئس۔ دیوان اٹی بی آر ایس پی، مسلم ایڈ، ہیلپنگ ہینڈ، سوسائٹی، یو این ایچ سی آر، اخوت، تعمیرِخلق فاؤنڈیشن، یونیسف، مرسی کور، ترقی فاؤنڈیشن، دانش، سحر و اسلامک ریلیف تون اوار کیہی جہانی و ہندی تنظیم آتا ڈویژنل و ضلعی نمائندہ غاک بشخ ہلکر۔ دیوان نا وخت آ ڈویژن و ضلع غاتیٹی برجا شونداری و راجی آسودہی نا ڈٹ، بروک آ وخت اٹی بنا مروک پروگرام و اوفتا پیش رفت آ سرجم جاچ رپورٹ پیش کننگا۔ شریدار آک فیلڈ اٹی پیش بروک انتظامی، سیکورٹی و ایلو عملی خواری تا بابت آگاہ کریر، وخت اس کہ دا ویل آتا وخت آ و بھرمی ایسری کن جتا جتا سلاہ ہم پیش کریر۔ دیوان اٹی دا ہیت آ امنا کننگا کہ کل غیر سرکاری تنظیم آک تینا ڈٹ آتیا عملدرآمد نا وخت آ ضلعی انتظامیہ تون پورو رابطہ و کمک ءِ پک کیر تاکہ ڈٹ آتا فائدہ غاک وخت آ و شفاف وڑ اٹ حقدار بندغ آتسکان سر مننگ کیر۔ داکان بیدس ڈٹ آتا چاروکی، شفافیت و کارکڑد ءِ جوانی نا کنڈ آ دننگ کن ڈویژنل انتظامیہ تون باقاعدہ وآب اٹ رپورٹنگ نا نظام پیدوار کننگ نا ہم فیصلہ کننگا، ہرانا رِد اٹ ڈٹ آتا پیش رفت، ہدف و دوئی مروک بھرم تا بابت وخت آ رپورٹ شیئر کننگک۔ دیوان آن تران کرسا کمشنر لورالائی ڈویژن ولی محمد بڑیچ پارے کہ حکومت بلوچستان السی فلاح و آسودہی، مدامگی شونداری و راجی خذمت آتا فراوانی کن غیر سرکاری تنظیم آتا کڑد انا قدر ءِ کیک۔ او پارے کہ کل ادارہ غاک تینا سرجز آتیٹی شفافیت، پرسجو و تین پہ تینی رابطہ ءِ شون ایتر تاکہ وسیلہ غاتا بھرمی کاریم اٹ اتنگ پک مننگ کے و شونداری ڈٹ آتا فائدہ غاک الس اسکان سرمریر۔ او مستی پارے کہ ڈویژنل انتظامیہ کل فلاحی و شونداری ادارہ غاتتون کمک ءِ برجا تخک ولے کل تنظیم آتے تعلقدار ضلعی انتظامیہ تون پیشگی حوال، حکومتی پالیسی تا پابندی و ہندی گرج آتے مون آ تخسا ڈٹ بندی کروئی مریک او پارے کہ تعلیم، جانجوڑی، سفا انگا دیر، غذائیت، زالبول و چنا تا فلاح، روزگار نا وارخواہی و موسمیاتی بدلی کون آ بشخ آتیٹی گچین سج پام وخت انا اہم ءُ گرج اسے۔ کمشنر پارت کرے کہ کل این جی اوز و آئی این جی اوک تینا سرجز، فنڈنگ، ہدف و ڈٹ آتا پوروی نا بابت باقاعدہ ڈیٹا ءِ ڈویژنل انتظامیہ تون شیئر شونداری سرجز آتا بھرمی چاروکی، وسیلہ غاتا انصاف اٹ بشخ و پانٹ و ادارہ غاتا نیام اٹی جوان ہم گرنچی ءِ پک کننگ مرے۔ لورالائی (میر محمود بلوچ)