اوغانستان نا صوبہ نورستان اٹ نوکاپ،23 بندغ زوال

اوغانستان نا دے ٹکی صوبہ نورستان اٹ نوکاپ و لینڈ سلائیڈنگ نا سوب آن 23 بندغ زوال و سد آن زیات گم مسنو۔ گم مروک آتیٹی صوبائی دارالحکومت پارون نا میئر و چندی سرکاری کارندہ غاک ہم اوار ءُ۔ اے ایف پی نا رداٹ ہندی بندغ آک دمب انا کیرغ مروک آتے پٹنگ کن کمکی کاریم کننگ ءُ و دا کاریم اٹ اسہ بلڈوزر اسے آن ہم کمک ہلنگ انگ ءِ۔ رپورٹ اٹ نیشنل ڈیزاسٹر ایجنسی و صوبائی گورنر نا دفتر نا بابت پاننگانے کہ 100 بندغ نا کچ گم ءُ۔ دیر انا مون اٹ برسا چندی ہوٹل، بازار و دوکانک پورو وڑ اٹ بھس مسنو۔ اوغان ہلال احمر سوسائٹی نا کمیونیکیشن چیف جمعہ خان نیل پارے کہ علاقہ ٹی بھلو کچ اسے ٹی بھسکاری مسنے و درزن نا کچ منشارکار آک بیلچہ و دُواٹ ڈیمبری تے اسہ کنڈ کننگ نا کوشست کننگ ءُ۔ او پارے کہ ہرا بندغ آتا اُراک بھس مسنو اوفتے کن زوت کنشت“ دیر و تمبوفراوان کننگ انگ ءِ۔ اوغانستان نا وزارت دفاع پارے کہ کمکی کاریم تیٹی کمک کن فوج ءِ علاقہ ٹی تعینات کننگانے، وخت اس کہ اقوام متحدہ پارینے کہ او بھسکاری نا جاچ ءِ ہلنگ اٹی ءِ۔