بنجائی وزیر خزانہ تون ہنی ویل ٹیکنالوجیز نا ڈل انا وڑدہی

بنجائی وزیر خزانہ و بنگ سینیٹر محمد اورنگزیب تون واشنگٹن ڈی سی ٹی ہنی ویل ٹیکنالوجیز نا وائس پریذیڈنٹ و جنرل منیجر بیری گلک مین نا کماشی ٹی ڈل اوڑدہی کرے۔ سے شنبے نادے آوزارت خزانہ غان جاری مروک بیان نا رداٹ اوڑدہی نا وخت آ بنجائی وزیر خزانہ پاکستان نا ریفائنری بشخ انا پوسکنوڑی و ودفنگ کن ہنی ویل نا سلاہ ئی زرکاری نا ستاءِ کرسا پارے کہ داڑان ملک انا ہندی ریفائننگ نا لائخی ٹی ودکی مریک و درآمدی پٹرولیم آ سیبو ءِ کم کننگ اٹ کمک رسینگک۔ اوڑدہی ٹی ہنی ویل نا پوسکن آ ٹیکنالوجی، ازباب و ریفائنری اپ گریڈیشن آ گپ و تران کننگا وخت اس کہ مالی کمک کن یو ایس ایگزم بینک، یو ایس انٹرنیشنل ڈویلپمنٹ فنانس کارپوریشن، چندی ایکسپورٹ کریڈٹ ایجنسی و جہانی بینک آتا کمک اٹ گمانی فنانسنگ نا گمان تیا ہم سجفنگا۔ بنجائی وزیر خزانہ پارے کہ دا سلاہ ئی ڈٹ پاکستان نا توانائی نا رکھ، صنعتی شونداری و مدامگی زرگزرانی ردوم نا مونی دننگ اٹ اہم کڑد ادا کیک۔