بلوچستان انفارمیشن کمیشن نا رِد اٹ حقِ معلومات ایکٹ نا بابت اسہ دے ئی آگاہی ورکشاپ نا اڈ تننگا

بلوچستان انفارمیشن کمیشن نا رِد اٹ معلومداری حق ایکٹ نا بابت اسہ دے ئی آگاہی ورکشاپ اس اڈ تننگا، ہراٹی سول سوسائٹی نا نمائندہ طالب علم‘ کانود انا بشخ اتون تعلقدار بندغ آک بشخ ہلکر۔ سیشن آن تران کرسا کمشنر بلوچستان انفارمیشن کمیشن عبدالشکور پارے کہ معلومداری حق انا کانود شفاف‘ پرسجوئی و الس دوست حکمرانی نا وڑانا پیش رفت اٹ بنداوی کڑد ادا کیک۔ او پارے کہ شاری تے سرکاری معلومداری اسکان وخت آ رسینگ گیگ فراوان کننگ ریاست نا ادارہ غاتا زمواری ءِ‘ وخت اس کہ معلومداری اسکان رسینگ گیگ آن نئے بیرہ الس نا پت بحال مریک بلکن گورننس نا نظام اٹی ہم جوانی بریک۔ او پارے کہ بلوچستان انفارمیشن کمیشن الس اٹی معلومداری نا حق انا کانود نا بابت سُج پام تالان کننگ کن جتا جتا ضلع غاتیٹی آگاہی پروگرام اڈ تننگ ءِ پدریسہ برجا تخک تانکہ زیات آن زیات شاریک تینا کانودی حق آن معلومدار مننگ کیر۔ ہیلکاری ورکشاپ نا اخیر اٹ کمشنر بلوچستان انفارمیشن کمیشن عبدالشکور بشخ ہلوک آتیٹی سَند بشخ و پانٹ کرے و دا اومیت نا درشانی ءِ کرے کہ شریدار آک معلومداری نا حق انا کلہو ءِ راج انا ہر تپہ اسکان سر کننگ اٹی تینا بھرمی کڑد ءِ ادا کیک۔