ڈپٹی کمشنر کیچ یاسر اقبال دشتی نا کماشی ٹی ڈسٹرکٹ ہیلتھ کمیٹی نا دیوان اڈ ہلک

ڈپٹی کمشنر کیچ یاسر اقبال دشتی نا کماشی ٹی ڈسٹرکٹ ہیلتھ کمیٹی نا اہم ءُ دیوان اس ڈپٹی کمشنر آفس تربت اٹی اڈ ہلک، ہراٹی ضلع کیچ اٹی جانجوڑی نا بشخ انا جم حالیت، طبی آسراتی تا فراوانی و جانجوڑی محکمہ ءِ مون تروک جتا جتا باندات آتا سرجم جاچ ءِ ہلنگا۔ دیوان اٹی ڈائریکٹر ہیلتھ مکران ڈاکٹر محب اللہ بلوچ، میڈیکل سپرنٹنڈنٹ ٹیچنگ ہسپتال تربت ڈاکٹر وحید بلیدی، جہانی جانجوڑی ادارہ نا ڈاکٹر ارسلان، پی پی ایچ آئی نا ڈسٹرکٹ سپورٹ منیجر ڈاکٹر مرتضیٰ بلوچ، ڈرگ انسپکٹر محمد اکرم بلوچ، ڈسٹرکٹ اکاؤنٹس آفیسر صدام بلوچ تون اوار تعلقدار محکمہ غاتا افسر آک بشخ ہلکر۔ دیوان نا وخت آ ضلع کیچ اٹی الس ءِ آب اٹو وخت آ طبی آسراتی تا فراوانی، سرکاری ہسپتال آتا کارکڑد، دارو تا ساڑی مننگ‘ طبی کارندہ غاتے مون تروک ویل و جانجوڑی نا بشخ ءِ پین بھرمی جوڑ کننگ نا جتا جتا پہلو تیا گپ وتران کننگا۔ داوخت آ ایم ایس ٹیچنگ ہسپتال تربت ڈاکٹر وحید بلیدی ہسپتال نا جم کارکڑد آ بریفنگ ترسا طبی خذمت، ناجوڑ آتے فراوان کروک آسراتی، جانجوڑی محکمہ نا ملازم آتا ہنکینی کوارٹر آتا الاٹمنٹ، بجلی، دیر، سیکورٹی و ایلو انتظامی باندات آتا بابت دیوان ءِ معلومدر کرے۔ او مون تروک ویل و اوفتا ایسری کن سلاہ ہم پیش کرے۔ اخیر اٹ ڈرگ انسپکٹر محمد اکرم بلوچ مچ آ ضلع ٹی کانودآن چَپ‘ ہیبدار و غیر رجسٹرڈ دارو تا برخلاف برجا کارروائی و آخبت نا سج پام آ بریفنگ تس۔ ہندا وڑ پی پی ایچ آئی نا ڈی ایس ایم ڈاکٹر مرتضیٰ بلوچ و جہانی جانجوڑی ادارہ نا ڈاکٹر ارسلان تینا تینا ادارہ غاتا کارکڑد، برجا جانجوڑی پروگرام و السی جانجوڑی نا جوانی کن کروک گام گیج آتا بابت بریفنگ تسر۔