کمشنر سیوی ڈویژن اسداللہ فیض نا کماشی ٹی ڈویژنل کوآرڈینیشن کمیٹی نا دیوان

کمشنر سیوی ڈویژن اسد اللہ فیض نا کماشی ٹی ڈویژنل کوآرڈینیشن کمیٹی نا دیوان اڈ ہلک، ہراٹی ڈی آئی جی پی سیوی رینج پرویز احمد عمرانی، ڈپٹی کمشنر سیوی میجر (ر) الیاس کبزئی، ڈپٹی کمشنر کچھی ممتاز علی کھیتران، ایس ایس پی سبی عبدالحمید تون اوار کانود نافذ کروک آ ادارہ غاتا افسر آک بشخ ہلکر، وخت اس کہ ڈپٹی کمشنر ڈیرہ بگٹی و ایلو تعلقدار افسر آک ویڈیو لنک نا کمک اٹ دیوان اٹی بشخ ہلکر۔ دیوان اٹی مسہ اہم ایجنڈا غا جم سجفنگا، ہرافتیٹی پروونشل ایکشن پلان، امن و ایمنی نا جم حالیت و قومی شاہراہ این-65 آ کمبڑی پول انا ہند آ پیش بروک دزی و داڑیلی نا واقعہ غاتا توننگ اوار ئس۔ ڈی آئی جی پی سیوی رینج پرویز احمد عمرانی دیوان ءِ پروونشل ایکشن پلان آ عملدرآمد، سیکورٹی بست و بند، سنیپ چیکنگ، پولیس چوکی تا کارکڑد و جتا جتا ضلع غاتیٹی امن و ایمنی نا حالیت آ بریفنگ تس۔ دا وخت آ ضلع کچھی و ضلع ڈیرہ بگٹی نا سیکورٹی حالیت و ہموڑے کروک گام گیج آتا بابت ہم شریدار آتے معلومدار کننگا۔ دیوان اٹی قومی شاہراہ این-65 آ ساڑی کمبڑی پول انا ہند آ دزی و داڑیلی نا ودوک آ واقعہ غاتیا خاص وڑ اٹ سجفنگا۔ شریدار آک دا ویل انا مدامگی ایسری کن جتا جتا سلاہ پیش کریر۔ دا وخت آ فیصلہ کننگا کہ ہندا علاقہ ٹی ڈوہ تے توننگ کن جامع سیکورٹی پلان جوڑ کننگک‘ ہرانا رِد اٹ حساس ہند آتیا پولیس و کانود نافذ کروک ادارہ غاتا ساڑی گری ءِ ودفنگک، سنیپ چیکنگ ءِ پین بھرمی جوڑ کننگک، وخت اس کہ گرج مس تو پوسکن ءُ چیک پوسٹ جوڑ کننگ و ساڑی چیک پوسٹ آتے فعال کننگ تون اوار پین رکھی گام گیج ہم کننگک تانکہ شاہراہ ءِ کاریم اٹ اتوک مسافر آتے رکھوک سفری چاگڑد فراوان کننگ مرے۔