ڈیوٹی کننگ آن پد ہم تنخواہ تیان کٹوتی اسُل بے انصافی اسے، وقاص شاہین

کوئٹہ(اے پی پی) آفیسرز ویلفیئر ایسوسی ایشن محکمہ تعلقات عامہ بلوچستان نا صدر وقاص شاہین و جنرل سیکرٹری ظفرعلی ظفر دا ہیت آ است ہسونی نا درشانی ءِ کرینو کہ کوروناوائرس نا نازرک حالیت آتے ٹی خذمت سر تننگ آن پد ہم تنخواہ تیان کٹوتی اسُل بے انصافی اسے۔ محکمہ تعلقات عامہ کوروناوائرس نا برخلاف سف اول نا سپاہی ءِ۔ مچ آ صوبہ ٹی آفیسر و کارندہ غاک دے و نن خواری اٹ حکومتی گام گیج آتا پبی کوریج ءِ کننگ ءِ۔ حکومت نا کنڈآن کوروناوائرس نا چٹفنگ کن کروک آ گام گیج آتے الس اسکان سرکننگ و شینک کننگ کن ہر وڑ اٹ کوشست کننگ ءِ۔ ہندا جوزہ، محنت ولگن اٹ فرض انا انجام تننگ آ ننا دفتر نا اسہ کارندہ اس کوروناوائرس نا گواچی مسنے۔ اوکان پد ہم محکمہ نا غٹ آفیسر و کارندہ غاک تینا زند آتا رسک ءِ ہلسا حکومتی گامگیج آتا پبی کوریج ءِ پک کننگ ءِ۔ اوداہیت آ است ہسونی نا درشانی ءِ کریر کہ حکومت نا ہفت المی محکمہ غاتیان بے کچ اہم و المی محکمہ مننگ آن پد ہم محکمہ نا آفیسر و کارندہ غاتا تنخواہ تیان کٹوتی اسُل ظلم و زیاتی اسے۔ دا نازرک حالیت آتے ٹی حکومت نا ایلو المی آ محکمہ غاتیانبار محکمہ تعلقات عامہ نا آفیسر آک ہم تینا زند ءِ خطرہ ٹی بٹسا تینا فرض ءِ جوان وڑاٹ انجام تننگ ءِ۔ اوحکومت آن خواست کرینو کہ محکمہ نا آفیسر و کارندہ غاتا خذٰمت آتے گوجالسا اوفتا تنخواہ تیان کٹوتی نا فیصلہ ءِ پدی ہلسا اوفتا است بڈی ءِ کننگے۔