بنجا و صوبائی حکومت آک الس نا برخلاف سازش کننگ اٹی ءُ، سپریم کورٹ

اسلام آباد( آن لائن) کورونا وائرس از خود نوٹس کیس انا سماعت نا وخت آ عدالت ریمارکس تسنے کہ وفاق و صوبہ اسہ وڑ انا پالیسی اس جوڑ کیر، آخا تو عبوری پرمان اس جاری کینہ۔ چیف جسٹس پارے کہ صدر، وزیر اعظم نا ارادہ غاک نیک مرور، ولے مروئی ءُ گڑا خننگپک۔ ادارہ غاک انت کننگ ءُ؟ ہچ سما تفک کہ ملک اٹ انت مننگ اٹی ءِ؟ ملک اٹی پورو وڑ اٹ استحصال مننگ ءِ، ہندن لگک بنجا و صوبائی حکومت آک الس نا برخلاف سازش کننگ اٹی ءُ، اسہ گڑا سے ٹی ہم شفافیت اف، کل کاریمک کاغد آتیٹی مننگ اٹی ءُ۔ ہراتم آڈت مس تو گڑا گڑاک مون آ بریرہ۔ ہچ ءُ اسہ وڑ انا حکمت عملی اس اف، اسہ وزیر اس پین ہیت اس کیک، ایلو پین گڑاس پاہک۔ اسہ صوبائی وزیر پاہک وزیراعظم نا برخلاف پرچہ درج کرفنک، یعنی صوبائی وزیر نا مزغ اسُل ہڑسینگانے۔ مزغ انت اسے آن ہڑسینگانے، دا سما اف۔ بنجائی حکومت نا پالیسی بیرہ 25 کلومیٹر اسکان ءِ۔ ڈاکٹر اسرار احمد نا ہیت آک اینو راست مننگ اٹی ءُ۔ او 20 سال مست اینو نا حالیت آتے پاریسس۔ جسٹس عمر بندیال ریمارکس تس کہ جوان و وژنری لیڈر شپ اسے نا کاختی ءِ۔ بنجا ٹی تولوک بندغ آتا رویہ گمری خننگک۔ اوفتا رویہ بنجا ءِ نسخان تننگ اٹی ءِ۔ مگہ بنجا ٹی تولوک آتے دا وڑ اٹ ہیت کننگ نا موکل ارے؟ انا و ضد اٹ حکومتی باندات آک چلینگپسہ۔ دو شنبے نا دے چیف جسٹس گلزار احمد نا سروکی ٹی سپریم کورٹ نا 5 باسکی لارجر بینچ اٹی کورونا وائرس از خود نوٹس کیس نا سماعت مس۔ بنجا نا کند آن اٹارنی جنرل، صوبہ غاتا کنڈ آن ایڈووکیٹ جنرل آک، و ہندن این ڈی ایم اے، وزارت جانجوڑی و ایلو تعلقدار محکمہ غاک ہم عدالت اٹ پیش مسر۔ سماعت نا بنا ٹی بنجا و صوبہ غاتا رپورٹ آتیا نا استی درشان کرسا چیف جسٹس ریمارکس تس کہ ٹیسٹنگ کٹ و ای پی پی تیا ارب آ روپئیک خڑچ کننگ انگ ءُ، ماسک و دستانہ کن اخس پیسہ درکار ءِ؟ اگہ تھوک اٹی ہلنگے تو 2 روپئی نا ماسک رسینگک، سما اف دا گڑاک ہراکان ہلنگ انگ ءُ، ہندن لگک کہ کل کاریمک کاغد آتیٹی مننگ ءُ۔ ہراخس کہ سرکاری رپورٹ بسنو، دافتیٹی ہچ اس ہم اف۔ دا دارہ غاک انت کننگ ءُ؟ اسہ گڑا سے ٹی ہم نجائی اف۔ کوویڈ 19 نا خڑچ آتا آڈٹ مس تو کل گڑا تا پت پاش مریک۔