خلقی و شاری علاقہ غاتا نیام اٹ فرق ءِ چٹفنگ کن سُج پام نا گرج ءِ، جعفر خان مندوخیل

گورنر بلوچستان جعفر خان مندوخیل پارینے کہ خلقی و شاری علاقہ غاتا نیام اٹ فرق ءِ چٹفنگ کن ننے اسہ ہندن ءُ جم سُج پام اسے نا گرج ءِ ہرا شاری تے کل بنداوی آسراتی و وارخواہی تیٹی بریبر رسینگ گیگ فراوان کے۔ پیدوار وژن و پامدار ڈٹ بندی آن بیدس خلق و بھلا شار تا نیام اٹ مُریک دے پہ دے ودسا کارہ و بریبر شونداری نا تغ پورو مفک۔ دا رد اٹ کل پالیسی میکر و الس نا گچین نمائندہ غاتا کڑد بھاز المی ءِ۔ نن دا فرق ءِ چٹفنگ کن انقلابی گام گیج ہرفنگ اٹی اُن۔ دا خیال آتا درشانی ءِ او گورنر ہاؤس کوئٹہ ٹی جتا جتا ڈل آتتون ہیت وگپ کرسا کرے۔ دا وخت آ گورنر بلوچستان جعفر خان مندوخیل پارے کہ دا ہیت راست ءِ کہ تعلیم ہر وڑ انا شونداری نا بنداو ءِ۔ تعلیم بیرہ جندی فائدہ اسے کن اف بلکن دا اسہ راجی میرات و روشنا آخبت نا ضمانت ءِ۔ گورنر مندوخیل پارے کہ پنجر (انفراسٹرکچر) ہر بریبر شونداری ڈٹ اٹی مخ آنبار مریک۔ قومی شاہراہ تے جوڑ کرسا نن خلقی علاقہ غاتا الس ءِ بھلا زرگزرانی و واپاری منڈی تتون گنڈنگ کینہ۔ دا کشارگر و پوریاگر آتے پوسکن آ وارخواہی تیٹی رسینگ گیگ، خڑچ انا کم کننگ و ننا بندغ آتے اسہ ایلو نا خڑک اتنگ نا لائخ جوڑ کیک۔ گورنر بلوچستان پارے کہ بریبر شونداری بیرہ اسہ تغ اس اف بلکن دا اسہ زرگزرانی و راجی گرج اسے۔ ہراتم نن خلقی علاقہ غاتے شون ایتنہ تو مچ آ صوبہ شون ہلیک۔ ہراتم نن تعلیم اٹی زرکاری کینہ تو نن شونداری نا پوسکن آ کسر تے ملنہ، نن اواری اٹ مون آ کانہ۔ او پارے کہ خوانندہ و شوندار بلوچستان نا تغ ءِ پورو کننگ کن ننے السی فائدہ غاتے کل پالیسی و ڈٹ آتا بنجا جوڑ کروئی مریک و ہنداٹی ننا اسیجائی و سرسہب آخبت نا ضمانت ءِ۔