نظامِ انصاف اٹی بندی تا حق آتے بنداوی حیثیت دوئی ءِ، چیف جسٹس

چیف جسٹس پاکستان جسٹس یحییٰ آفریدی پارینے کہ نظامِ انصاف اٹی بندی تا حق آتے بنداوی حیثیت اس دوئی ءِ، وخت اس کہ جیل آتیٹی جانجوڑی آسراتی و سفا انگا دیر انا فراوانی ءِ امر کہ مرے پک کننگے۔ جیل اصلاحات آ اڈ ہلوک قومی کانفرنس آن تران کرسا چیف جسٹس کل شریدار بندغ آتے بخیر پارے و دا اومیت نا درشانی ءِ کرے کہ کانفرنس نا سلاہک جیل انا نظام اٹی جوان ءُ بدلی اسے نا سوب مریرہ۔ او پارے کہ جیل آتا حالیت آتے جوان کننگ آئینی وڑاٹ صوبائی حکومت آتا زمواری ءِ و دا رِد اٹی بھرمی گام گیج المی ءِ تانکہ بندی تے بنداوی انسانی حق و درکار آسراتیک رسینگ کیر۔ چیف جسٹس یحییٰ آفریدی پارے کہ پد سلوک مقدمہ غاتے سر تننگ نا بابت اہم ءُ پیشرفت اس مسنے، ولے انصاف نا فراوانی بیرہ عدالتی فیصلہ غاتیان آخا بلکہ اوفتیا بھرمی عملدرآمد آن مننگ کیک۔ او مستی پارے کہ عدالتی نظام اٹی پاش وڑاٹ پرسجوئی ءِ پک کننگ کن پدریسہ گام گیج کننگ انگ ءِ‘ تانکہ الس نا نظامِ انصاف آ پت پین سوگو مرے۔