وزیراعظم شہباز شریف نا مبارکبادی،ایف بی آر 12.957 کھرب روپئی نا تاریخی ریونیو ہدف آ سر مس

وزیراعظم محمد شہباز شریف مالی سال 2025-26 اٹی فیڈرل بورڈ آف ریونیو (ایف بی آر) نا کنڈ آن 12.957 کھرب روپئی نا تاریخی بنگ انا ہدف ءِ سر مننگ آ ادارہ نا سینئر افسر و کل کارندہ غاتے مبارکبادی ترسا پارے کہ دا قومی زرگزران کن اسہ اہم ءُ مزل نا نشان اسے۔ وزیراعظم ہاؤس اٹی ایف بی آر نا سینئر افسر آتتون اوڑدہی نا وخت آ وزیراعظم پارے کہ او ایف بی آر نا ہر افسر و کارندہ ءِ جندی و جم وڑاٹ دا شانی آ کارکڑد آ خراج تحسین پیش کیک۔ او پارے کہ تدوک آ مالی سال اٹی کم و ود 600 ارب روپئی نا ٹیکس ریفنڈز نا وخت آ تننگ آن پوریاگر تپہ ءِ آسراتی رسینگا و برآمد آتا پیشرفت اٹ ہم کمک رسینگا۔شہباز شریف ایف بی آر نا فیلڈ فارمیشن و افسر آتے پارت کرے کہ او ہندا جوزہ اٹ کاریم کرسا برجا مالی سال اٹی 15 کھرب روپئی آن زیات بُنگ انا ہدف ءِ دوئی کیر۔ وزیراعظم دا سرسہبی ءِ نائب وزیراعظم اسحاق ڈار، وزیر خزانہ محمد اورنگزیب، وزیر مملکت بلال اظہر کیانی، اٹارنی جنرل منصور اعوان، چیئرمین ایف بی آر راشد محمود لنگڑیال، زرگزرانی ٹیم و ایف بی آر نا افسر آتا سوب گوندا۔ او فیلڈ مارشل سید عاصم منیر و کانود نافذ کروک آ ادارہ غاتے اسمگلنگ نا توننگ و ایف بی آر افسر آتے سیکورٹی فراوان کننگ نا ہم ستاءِ کرے۔ وزیراعظم پارے کہ مُر انگا علاقہ غاتیٹی تینا جان تے دلدست آ تخسا ٹیکس و کسٹم ڈیوٹی نا نفاذ ءِ پک کروک آ افسر آتا خذمت آک ستا کڑزرہ۔ او پارے کہ تدوک آ دونیم سال اٹی ایف بی آر اٹی برجا اصلاحات، ڈیجیٹلائزیشن، بھرمی چاروکی و ٹیم ورک نا سوب آن ادارہ ریکارڈ بُنگ مچ کننگ اٹی سرسہب مسنے۔ او پارے کہ ایف بی آر اٹی اصلاحات حکومت نا اولیت ءِ، ہندا سوب آن او تینٹ ہر تُو اٹی اِرا وار ادارہ نا جاچ دیوان آتا کماشی ءِ کیک۔ وزیراعظم پارے کہ فیلڈ فارمیشن اٹی جوان پنی آ افسر آتا تقرری ءِ پک کننگانے و ایف بی آر اٹی وڈی خور آتیکن ہچ ءُ جاگہ اس مفک۔