حکومت بلوچستان و پٹرولیم وزارت نا لو بی ٹی یو گیس ءِ کاریمی جوڑ کننگ آ امنا

وزیراعلیٰ بلوچستان میر سرفراز بگٹی و بنجائی وزیر پیٹرولیم علی پرویز ملک نا کماشی ٹی اڈ ہلوک اسہ اہم دیوان اسے ٹی بلوچستان اٹی ساڑی لو بی ٹی یو (Low BTU) گیس انا بھرمی کاریم اٹ اتنگ، مونیٹائزیشن و اوڑتون تعلقدار شونداری وارخواہی تا جم جاچ ءِ ہلنگا۔ دیوان اٹی حکومت بلوچستان و وزارت پیٹرولیم نا نیام اٹی لو بی ٹی یو گیس ءِ کاریم اٹ اتنگ آ پورو امنائی کننگا۔ دیوان اٹی فیصلہ کننگا کہ لو بی ٹی یو گیس انا کاریم اٹ اتنگ، زرکاری و واپاری وارخواہی آتے عملی دروشم تننگ کن اسہ پنجر اس ٹہیفنگے۔ دا مسخت کن وزارت پیٹرولیم و حکومت بلوچستان نا کارندہ غاتیا تالان اسہ اسیجائی ورکنگ گروپ اس جوڑ کننگانے ہرا جولائی 2026 نا اخیر اسکان جم سلاہ تیا تالان پنجر ءِ شین ایتک۔ دیوان اٹی دا ہیت آ ہم امنائی مس کہ سوئی و ایلو علاقہ غاتے ٹی دوئی لو بی ٹی یو گیس ءِ ارزان بجلی نا پیداوار، فرٹیلائزر صنعت و ایلو واپاری سرجز آتے کن کاریم اٹ اتنگے تانکہ صوبہ ٹی صنعتی و زرگزرانی سرجز آتے شون تننگ مرے۔ وزارت پیٹرولیم دا رد اٹ اوگرا فیلڈ ڈویلپمنٹ و اوگرا ٹرانسپورٹ لیسن جاری کننگ نا بابت پورو کمک نا باور کرفے۔ بنجائی وزیر پیٹرولیم علی پرویز ملک حکومت بلوچستان ءِ تھرڈ پارٹی کمپنی نا کمک اٹ ایکوئٹی دوئی کننگ نا سلہ خلسا پارے کہ حکومت بلوچستان انت کہ فیصلہ کیک، وزارت پیٹرولیم اوڑتون پورو کمک کیک۔ او دا عزم انا درشانی ءِ کرے کہ بلوچستان نا قدرتی وسیلہ غاتا حقی فائدہ ہندی آبادی اسکان سرکننگ بنجائی حکومت نا اولیت آتے ٹی اوار ءِ۔ دیوان اٹی دا ہیت آ ہم امنائی مس کہ کارپوریٹ سوشل ریسپانسبلٹی (CSR) فنڈ آتے ہندی آبادی نا آسودہی، راجی شونداری و السی فائدہ نا ڈٹ آتیا خڑچ کننگے تانکہ وسیلہ غاتا بھرم دراست الس اسکان رسینگ کے۔ بنجائی وزیر پیٹرولیم کلچاس ڈرلنگ و زنک ہیڈ ڈٹ ءِ فعال جوڑ کننگ کن تعلقدار ادارہ غاتے دمدستی گام گیج نا پارت کرے تانکہ دا ڈٹ آتے ٹی گنڈوک زرگزرانی و صنعتی فائدہ غاک زوت آن زوت دوئی مریر۔ دا وخت آ وزیر اعلیٰ بلوچستان میر سرفراز بگٹی پارے کہ لو بی ٹی یو گیس ءِ کاریم اٹ اتسا بلوچستان نا زرگزرانی شونداری، صنعتی آسودہی و پوریا نا پوسکن ءُ وارخواہی ودی کننگک۔ او پارے کہ سوئی تون اوار ڈیرہ بگٹی نا دے ٹک و دے کی ٹی لو بی ٹی یو گیس انا کاریم اٹ اتنگ آن صنعتی شونداری نا اسہ پوسکن ءُ دور اسے نا بنا مریک ہراڑان نئے بیرہ ہندی زرگزران سوگو مریک بلکہ زرکاری نا پوسکن آ درگہ غاک ہم ملنگرہ۔ وزیراعلیٰ بلوچستان پارے کہ بلوچستان نا قدرتی وسیلہ غاتیان دوئی مروک آ فائدہ غاک کل آن مست ہندی آبادی اسکان سرکننگر و دا بنجا و صوبہ ہڑتوم آ تا اسیجائی زمواری ءِ۔ او پارے کہ حکومت بلوچستان وسیلہ غاتا بھرمی مونیٹائزیشن نا کمک اٹ صوبہ نا زرگزرانی وتواجہی ءِ پین سوگو کننگ کن عملی گام گیج کننگ اٹی ءِ۔ سوئی ٹی لو بی ٹی یو گیس ءِ مونیٹائز کرسا ہندی آبادی نا زند نا آب ءِ جوان کرسا مدامگی شونداری ءِ پک کننگک۔ میر سرفراز بگٹی دا پت انا درشانی ءِ کرے کہ بنجا و صوبائی حکومت نا نیام اٹی بھرمی کمکاری نا سوب آن بلوچستان اٹی صنعتی، اقتصادی و راجی شونداری نا رفتار پین ترند مریک۔ او پارے کہ ریاست پاکستان و بلوچستان نا الس نا فائدہ کن کل جم شونداری ڈٹ آتا پورو مخ تفی ءِ کننگک تانکہ صوبہ نا شونداری و آسودہی نا پوسکن آ ہدف آتے دوئی کننگ مرے۔ دیوان اٹی بنجائی وزیر پیٹرولیم علی پرویز ملک و اونا ٹیم ویڈیو لنک انا کمک اٹ بشخ ہلکر وخت اس کہ وزیراعلیٰ بلوچستان میر سرفراز بگٹی تون اوار پارلیمانی سیکرٹری توانائی بلوچستان میر اصغر رند، چیف سیکرٹری بلوچستان شکیل قادر خان، بلوچستان بورڈ آف انویسٹمنٹ اینڈ ٹریڈ نا وائس چیئرمین بلاول خان کاکڑ، سیکرٹری انرجی اسفندیار کاکڑ، پرنسپل سیکرٹری عمران زرکون و ایلو تعلقدار کمامدار آک دیوان اٹی ساڑی ئسر۔