مولانا فضل الرحمان تون گپ و تران مدام اسہ ویدن اس سلک،وزیراعظم شہباز شریف

وزیراعظم محمد شہباز شریف پارینے کہ مولانا فضل الرحمان تون اونا متکن تعلقداری و شرف انا رشتہ ءِ، اونا و مولانا نا نیام اٹ تخلیہ ٹی ہرا ہیت آک مسنو او مدام راز سلرہ۔ چارشنبے نادے آ قومی اسمبلی ٹی دیوان اٹی مولانا فضل الرحمان نا ایوان اٹی تران نا بابت گپ وتران کرسا وزیراعظم پارے کہ مولانا فضل الرحامن تون اونا متکن ءُ تعلقداری اسے، اونا و مولانا نا نیام اٹ تخلیہ ٹی ہرا ہیت آک مسنو او قیامت اسکان رازسلرہ و کن تون قبراٹی کارہ۔ داکان مست وزیراعظم ایوان اٹی سرمس تو باسک آک ڈیسک آتے خلسا اودے بخیرکریر، وزیراعظم سیدھا اپوزیشن نا نشست آتیا ہنا و اپوزیشن لیڈر محمود خان اچکزئی، گوہر علی خان، مولانا فضل الرحمان، لطیف کھوسہ، حمید حسین تون اوار اولیکو صف اٹی تولوک اپوزیشن باسک آتتون جوڑ بڑ کرے۔ اومولانا فضل الرحمان تون زرس ہُرے اسکان گپ وتران ہم کرے۔ اوکان پد او ایوان اٹی مولانا فضل الرحمان نا کنڈآن چست کروک آ گڑاس ٹک آتا ورندی ٹی پارے کہ مولانا فضل الرحمان تون اونا گچین تعلقداری ءِ و اوڑتون شرف انا رشتہ ءِ۔ اونا تران ءِ ای بنگونٹ۔ کنا گیشتر مولانا فضل الرحمان تون اوڑدہی مریک۔ اونا و کنا نیام اٹ تخلیہ ٹی ہراہیت آک مسنو او قیامت اسکان راز ءُ و قبراٹی کنتون کارہ۔ اوکان پد مولانا فضل الرحمان بشخندہ کرسا پارے کہ وزیراعظم ہرا مہرومریبت نا درشانی ءِ کرینے اونا ستاءِ کیوہ، اگہ او تنیائی ٹی مروک آ ہیت آتے پبلک کے تو ای است اٹ کپرہ، ہراڑا وزیراعظم پارے کہ او مولانا فضل الرحمان نا سلہ ءِ اونا است انا بھلنی نا بنداو آ قبول کپک انتئے کہ داڑان باندات آک مراسکان کارہ۔ بلاول بھٹو زرداری ہم وزیراعظم تون اونا نشست آ ہنسا جوڑ وبڑ کرے۔ (اے پی پی)