بلوچستان ہائیکورٹ: پراونشل بار کونسل نا دفتر نا بابت سروس رپورٹ پیش کننگ نا پارت

کوئٹہ (خ ن) بلوچستان ہائی کورٹ نا چیف جسٹس محمد کامران خان ملاخیل و جسٹس نجم الدین مینگل آ تالان اِرا باسکی بنچ اسہ اہم ءُ آئینی درخواست اسے نا سماعت ءِ کرسا کیس ءِ مستی کارروائی کن پنچ باسکی لارجر بنچ آ راہی کرے‘ عدالت پارینے کہ سماعت مروک جھیڑہ لیگل پریکٹیشنرز اینڈ بار کونسلز ایکٹ 1973 نا کانودی دفعہ غاتا تشریح نا بابت بھاز اہم ءُ باندات اسے‘ ہرانا مریس وختی کانودی زہمک مریرہ‘ سماعت نا وخت آ ورندی تروک نمبر 1 یعنی ایڈووکیٹ جنرل بلوچستان نا کنڈ آن پیش مروک ایڈیشنل ایڈووکیٹ جنرل ورندی داخل کننگ کن وارخواہی نا خواست کرے، ہرادے عدالت نوٹ کرے۔ ورندی تروک نمبر 2 سیکرٹری بلوچستان پراونشل بار کونسل نا کنڈآن ہم خواست کننگا کہ اوفتے پٹیشن نا نقل فراوان کننگے و پیرا وائز کمنٹ؍ ورندی سوغند نامہ داخل کننگ کن وخت تننگے۔ عدالت ءِ پاننگا کہ ورندی تروک نمبر 3 و ورندی تروک نمبر 4 نا انرولمنٹ کمیٹی نا باسک محمد افضل حریفال ءِ مون تروک نوٹس آک پدی رسینگتنو و نہ او عدالت اٹی پیش مس، وخت اس کہ نوٹس نا تعمیل و کیہی وار بٹنگ انگ آن پد ہم کمیٹی نا ایلو باسک نادر علی چھلگری عدالت اٹی حاضر متو۔ ہندا وخت آ عظمت اللہ کاکڑ ایڈووکیٹ انرولمنٹ کمیٹی نا مسٹمیکو باسک نجیب اللہ کاکڑ نا کنڈ آن وکالت نامہ جمع کرفسا پٹیشن نا نقل خواست کرے۔ عدالت درخواست گزار نا سینئر وکیل ءِ پارت کرے کہ عدالت اٹی ساڑی کل فریق آتا وکیل آتے پٹیشن نا نقل آک دمدستی فراوان کننگر تانکہ مقدمہ نا کارروائی بے اڑاند مون آ ہِننگ کے۔ سماعت نا وخت آ بلوچستان بار کونسل سبی و نصیر آباد زون نا ایڈووکیٹ و باسک رحیم خان بلیدی آرڈر I رول 10 سی پی سی نا رِد اٹ مقدمہ ٹی درخواست گزار نا وڑ اٹ اوار مننگ نا درخواست دائر کرے۔ درخواست گزار نا وکیل داڑا ہچ ءُ اعتراض اس کتو، ہندا سوب آن عدالت درخواست ءِ منظور کرسا اودے مقدمہ ٹی اوار کرے۔ عدالت مستی پارت کرے کہ درخواست گزار مٹ مروک سرحال ءِ داخل کے و اگہ گرج مس تو ودکی کانودی ٹک ہم اوار کننگ کیک۔ عدالت دفتر ءِ پرمان کرے کہ کل غیر حاضر ورندی تروک آتے ولدا نوٹس جاری کننگے و سیکرٹری بلوچستان پراونشل بار کونسل نا دفتر نا کمک اٹ سروس رپورٹ ہم پیش کننگے۔