شفاف گچین کاری متو تو سپریم کورٹ نیام تمک، چیف جسٹس

اسلام آباد : چیف جسٹس پاکستان عمر عطا بندیال پارینے کہ اگہ شفاف گچین کاری تے ٹی بدنیتی مس تو سپریم کورٹ نیام تمک‘ سپریم کورٹ اٹ سی سی پی او لاہور غلام محمود ڈوگر کیس انا سماعت مس‘ عدالت درخواست ءِ پدی ہلنگ آ غلام محمود ڈوگر نا تبادلہ نابرخلاف اپیل ءِ خارج کرے۔ الیکشن کمیشن نا وکیل پارے کہ نگران حکومت جوڑ مننگ آن پد گچین کاری شیڈول جاری مسنے۔ آرٹیکل218 نا رد اٹ ساف شفاف گچین کاری کرفنگ ننا زمواری ءِ۔ لیول پلیئنگ فیلڈ اکن بیورو کریسی ٹی بدلی کننگ ہم الیکشن کمیشن نا واکداری ءِ‘ نگران حکومت ہم الیکشن کمیشن نا منظوری اٹ افسر اسے بدل کننگ کیک۔ چیف جسٹس پارے کہ ساف شفاف گچین کاری تیکن تبادلہ نا واکداری ءِ الیکشن کمیشن کاریم اٹ اتیک پک مس کہ حکومت بدلی تے الیکشن کمیشن نا موکل اٹ کیک۔ الیکشن کمیشن تینٹ ہم نگران حکومت ءِ افسر آتے بدل کننگ نا پرمان کننگ کیک۔ چیف جسٹس عمر عطا بندیال پارے کہ الیکشن کمیشن نا واکداری بھاز بھلن ءِ‘ کل سیاسی جماعت آتے گچین کاری تے ٹی بریبر وارخواہی رسینگے‘ الیکشن کمیشن ءِ نگران حکومت ءِ بدلی نا پاش واکداری بایدے تننگپ‘ نگران حکومت آن الیکشن کمیشن بایدے دا وڑ انا تبادلہ نا بارو اٹ سوج کے‘ بھاز وخت سپریم کورٹ نا ہیت آتا غلط مطلب ہلنگک‘ نن اسہ کیس اسے ٹی پارین 1988 اٹ اسہ ایماندار ءُ وزیراعظم اس ئس‘ ننا دا ہیت ءِ پارلیمنٹ غلط پہہ مس‘ نن دا پاتون کہ اینو اسکان بیرہ اسہ ایماندار ءُ وزیراعظم اس بسنے۔ چیف جسٹس پارے کہ نن آئینی ادارہ غاتا تینا فیصلہ غاتے ٹی رکھ ءِ کرینن‘ عدلیہ غا ہم جلہو مننگ اٹی ءِ‘ عدلیہ نا رکھ ءِ کینہ‘ الیکشن کمیشن اسہ آئینی ءُ ادارہ اسے ہرانا رکھ ءِ سپریم کورٹ کیک‘ الیکشن کمیشن تون آئین نا رد اٹ واکداری ارے ہرانا مسخت شفاف گچین کاری کرفنگ ءِ‘ اگہ شفاف گچین کاری متو تو سپریم کورٹ نیام تمک۔ چیف جسٹس پارے کہ سپریم کورٹ آئینی ءُ ادارہ اسے ہرادے آڈیو ٹیپ آتا کمک اٹ بدنام کننگ انگ ءِ‘ نن صبر و درگزر کرسا آئینی ادارہ نا رکھ ءِ کینہ‘ آئینی ادارہ غاتے بدنام کروک دا آڈیوٹیپ آتا ہچ ءُ اہمیت اس اف‘ نن دا ٹیپ آتیا صبر و درگزر نشان تننگ اٹی ان و ادارہ نا رکھ ءِ کینہ۔

(مانیٹرنگ ڈیسک)