بلوچستان اٹ زرگزرانی وارخواہی تیان فائدہ ہرفنہ، برطانوی ہائی کمشنر

کوئٹہ : کراچی ٹی مروک آ برطانیہ نا ڈپٹی ہائی کمشنر سارہ مونی(SARA MOONY) پارینے کہ برطانیہ پاکستان تون پک انگا واپاری ٹارگٹ آتے 8بلین پاونڈ اسکان ودفنگ خواہک۔ ارا کنڈی واپاری نا جوانی کن واپاری آ گڑاتا مہشون اٹ 150 پین آئٹم آتے اوار کرینے۔ بورڈ آف انویسٹمنٹ برطانیہ (بی آئی ائی)پنجاب و سندھ نا وڑ اٹ بلوچستان ٹی سرمایہ کاری خواہک۔ وخت اس کہ کانکنی نا بشخ ءِ ساڑی دور اتون اوار کننگ کن ننا کنسلٹنسی فرم ہر وڑ نا کمک کن وخت آ تیار اف۔ دا خیال آتا درشانی ءِ او تدوک آ دے ایوان صنعت و تجارت کوئٹہ بلوچستان نا صدر حاجی عبداللہ اچکزئی، سنیئر نائب صدر حاجی آغا گل خلجی، نائب صدر سید عبدالاحد آغا و مسکوہی صدر حاجی جمعہ خان بادیزئی تون کوئٹہ نا ہندی ہوٹل اٹ اوڑدہی نا وخت آ ہیت وگپ کرسا کرے۔ اوڑدہی نا وخت آ چیمبر آف کامرس اینڈ انڈسٹری کوئٹہ بلوچستان نا صدر حاجی عبداللہ اچکزئی، سنیئر نائب صدر حاجی آغا گل خلجی و نائب صدر سید عبدالاحد آغا پارینے کہ بلوچستان وارخواہی تا ڈغار ءِ۔ ہراڑے سد آ کلومیٹر تون گنڈوک سوردیر کرک، کیہی قیمتی گڑا، ریکوڈک و سیندک پروجیکٹ آنبار ءُ ڈٹ اریر۔ وخت اس کہ سی پیک آنبار گیم چینجر ڈٹ ہم گوادر بلوچستان اٹی ءِ۔ بلوچستان اٹ مروک آ فروٹ و سوزیک ہم تینا مٹ تینٹ ءُ۔ گرج دا ہیت انا ءِ کہ پاک برطانیہ واپاری حجم ءِ پین ودفنگے۔ دا بابت اٹ چیمبر آف کامرس اینڈ انڈسٹری کوئٹہ بلوچستان ہر وڑ نا کمک کن تیار ءِ۔ او وخت آ برطانوی ڈپٹی ہائی کمشنر سارہ مونی(SARA MOONY) نا پاننگ ئس کہ اوفتا بلوچستان بننگ نا مسخت ساڑے ساڑی سرمایہ کاری نا وارخواہی ءِ پہہ مننگ تون اوار خدو نوکاپ آن مروک آ بھسکاری و اُلس ءِ دوئی آ ویل آتا بارواٹ دوئی کروئی ئس۔

(آن لائن)