سرسہب نظام ءِ چلیفنگ کن سزا و جزا المی ءِ، احسن اقبال

اسلام آباد : بنجائی وزیر ڈٹ بندی شونداری و خصوصی گام گیج پروفیسر احسن اقبال پارینے کہ سرسہب نظام ءِ چلیفنگ کن سزا و جزا المی ءِ وخت اس کہ گچین کارکڑد والا ملازم آتا است بڈی المی ءِ۔ سے شنبے نادے آ وزارت ڈٹ بندی نا آفیسر و ملازم آتیٹی ایوارڈ بشخنگ نا دود آن تران کرسا بنجائی وزیر پارے کہ دود انا بنداوی مسخت وزارت نا آفیسر ہرافتے ٹی غٹ کیڈر آک اوار ءُ اوفتا کاریم نا است بڈی ءِ کننگ ءِ، ہرانا بناءِ بنجائی وزیر 1999ء ٹی کریسس۔ بنجائی وزیر وزارت ڈٹ بندی نا آفیسر آتا است بڈی کن 1999 اٹی بناکروک آ روایت ءِ بحال کرسا وزارت اٹی گچین کارکڑد نشان تروک آ آفیسر و ملازم آتیٹی سفتی سند بشخا ہراٹی کیش انعام ہم اوار ءِ۔ غٹ کیڈرآتا کل 22 آفیسر ہرافتے شاندار کارکڑد آ سفتی سند تننگا ہراٹی کیش انعام ہم اوار ءِ۔ داوخت آ تران کرسا بنجائی وزیر پارے کہ سرسہب نظام ءِ چلیفنگ کن سزا و جزا المی ءِ وخت اس کہ گچین کارکڑد والا ملازم آتا است بڈی المی ءِ۔ بنجائی وزیر ملازم آتیا زور شاغا کہ او تینا کارکڑد و پیدواری لائخی ٹی ودکی کیر و تینا کاریم ءِ اسہ مشن اسے نا وڑاٹ ہرفسا کار انتئے کہ پاکستان اسہ بھلو حالیت اسے آن گدرینگ انگ ءِ و داوخت اٹی تینا پرفارمنس ءِ ودفنگ نا ءِ تانکہ پیدواری لائخی ءِ پین ودفنگ مرے۔ داکان بیدس، بنجائی وزیر السی بشخ انا کاریم ءِ گچین کننگ کن آخبت اٹ داوڑنا گام گیج آتے برجاتخنگ نا اومیت ظاہر کرے۔ داوخت آ سیکرٹری وزارت ڈٹ بندی سید ظفر علی شاہ ایوارڈ ہلوک آتے مبارکبادی ترسا پارے کہ اینو نا دود اٹی ہمو آفیسر آتا کوشست آتا ستاءِ کننگے ہرافک گچین کارکڑد نا درشانی ءِ کریر۔ اواومیت ظاہر کرے کہ دا عمل آن آفیسر آتا پین است بڈی مریک و اوفتا کاریم اٹی پین گچینی ہم بریک۔

(اے پی پی)