سپریم کورٹ پریکٹس اینڈ پروسیجر بل سینیٹ آن ہم منظور

اسلام آباد : سینٹ سپریم کورٹ پریکٹسز اینڈ پروسیجر بل تون اوار لائرزویلفیرز اینڈ پروٹیکشن بل 2023 گیشتری اٹ منظور کرے بل انا مخ تفی ٹی 60 وخت اس کہ مخالفت اٹ 19وونٹ بٹنگار۔ بل انا منظوری نا وخت آ اپوزیشن نا پبی برانز‘ چیئرمین سینٹ نا ڈائس نا مون آ مچ مسر و بل انا کاپی تے ارار۔ پنچ شنبے نادے سینٹ نا دیوان اٹ سپریم کورٹ واکداری تا بابت بل انا قومی اسمبلی آن منظوری آن پد سینٹ اٹ ہم پیش کرسا بنجائی وزیرکانود سینیٹر اعظم نذیر تارڑ پارے کہ آئین نا آرٹیکل 191 نا رد اٹ پارلیمنٹ کانود جوڑ کننگ کیک او پارے کہ آئین نا رد اٹ سپریم کورٹ رولز فریم کرے و وخت اتون اوار اوار دا رول تے ٹی ترمیم نا گرج مریک تاکہ دادے پوسکن آ دور انا خواست آتتون ہمگرنچ کننگ مرے‘ او پارے کہ تدوک آ اِرا دہائی اٹ دا ٹرینڈ خننگا کہ جیف جسٹس صاحب سپریم کورٹ ءِ جم سوچ اٹ چلیفنگ نا جاگہ غا تینا خود آن فیصلہ کرے و مچ آ پاکستان نا چندی بشخ آتیان دا بارو اٹ توار چست مننگ بنا کرے۔ اوپارے کہ کانود جوڑ کننگ مقننہ ناکاریم ءِ وخت اس کہ عدالتی امورک عدلیہ نا زمواری ءُ۔ او پارے کہ آئین نا رد ٹ اسٹ ایلو نا دنگ اٹ سٹی نیام تمپننگ نا پاننگانے۔ او پارے کہ بدبختی اٹ ہندن ءُ دور ہم بس ہراتم ایگزیکٹیوتے کانود نا کٹہرے ٹی سلفنگا و اسہ چیف جسٹس اسے نا ضد اناسوب آن ہسپتال کون آ السی فائدہ نا ڈٹ ءِ ہم نسخان رسیفنگا‘ او پارے کہ سوموٹو نابابت ہم مچ سوچ اناگرج ءِ‘ او پارے کہ سوموٹو نابابت ملک ءِ ارب آ ڈالر نا نسخان رسیفنگا‘ داسہ دا بابت ہم عدل نا ایوان تیان ہم توار چست کننگانے و دا بابت بل بل ءِ قومی اسمبلی ٹی پیش کننگا ہرادے ترمیم تون اوار منظور کننگا‘ او پارے کہ دا بل انا رد اٹ سپریم کورٹ اٹ بنچ جوڑ کننگ کن کمیٹی ٹہیفنگ نا سلاہ تننگانے‘ او پارے کہ بایدے نن ادارہ غاتے سوگو کین‘ اوپارے کہ داسہ واکداری تے مسہ باسکی کمیٹی ءِ تننگانے ہراٹی چیف جسٹس تون اوار اِرا سینئر جج ءِ سلاہ کن تخنگانے‘ اوپارے کہ سپریم کورٹ کل آن آخریکو عدالت ءِ و داڑان بے انصافی ءِ چٹفنگ کن پاکستان بار کونسل تون اوار کیہی اسٹیک ہولڈر آتا کنڈآن توار چست کننگانے‘ داسہ سپریم کورٹ نا فیصلہ نابرخلاف اپیل نا حق تننگانے و دا بابت تدوک آدور اٹ ہرا بے انصافیک مسنو‘ دابابت ہم 30دے اٹ اپیل فائل کننگ مریک۔ دا وخت آ سینٹ اٹ اپوزیشن لیڈر سینیٹر شہزاد وسیم پارے کہ حکومت نت انا لین تے چٹفنگ کپننگ ءِ وداسہ دا سپریم کورٹ نا رول آتے جوڑ کننگ اٹی ءِ۔ او پارے کہ سپریم کورٹ نا رول تے ٹی ترمیم مننگ کیک‘ حکومت عدلیہ ءِ تینا کاریم ءِ کننگ کن الے‘ او پارے کہ ساڑی حکومت اسہ وار ولدا سپریم کورٹ ءِ بشخ وپانٹ کننگ اٹی ءِ‘ حکومت دا ترمیم ءِ ہم کرینے کہ مسکوہی دور تے ٹی مروک سوموٹو تے ہم چیلنج کننگ مریک۔

(آن لائن)