بلوچستان، چندی شار تیٹی پر تا چرجوئی برجا

کوئٹہ : بلوچستان نا چندی شار تے ٹی پر تا چرجوئی برجاءِ‘ پِر آن شیفکو علاقہ غاتے ٹی دیر سلیس وجل تا دیر اتنگ ناسوب آن الس ءِ فریشانیک مون تروک ءُ‘ سنجاوی ٹی پِر انا سوب آن چھت انا تمنگ آن اسہ بندغ اس زوال مس۔ بلوچستان نا چندی علاقہ غاتے ٹی تدوک آ کیہی دے آن برجا پر تا چرجوئی داسکان برجاءِ‘ پِر انا سوب آن کوئٹہ ٹی سیوریج نا سسٹم بے سہب مسنے۔ مخلوق ءِ فریشانیک مون تروک ءُ‘ گند انا سوب آن ناجوڑی تا تالان مننگ نا خلیس ارے۔ میٹرو پولیٹن کارپوریشن نا کنڈآن سَفائی کن کروک گام گیج کرسا نالی تا سَفائی ءِ پک کننگ انگ ءِ‘ تدوک آ دے پِر اناسوب آن کوئٹہ سبی شاہراہ بولان نا علاقہ ٹی پنجرہ پول انا ہند آ جوڑ کروک وختی کسر ءِ نوکاپ نادیر درینے ہرانا سوب آن ٹریفک نا ہن وبر معطل مسوسس و مخلوق بھاز خوار مسوسس۔

(آن لائن)