پشاور، پولیس لائن مسیت اٹی دھماکہ ، شہید مروک آتا کچ 93 ءِ سر مس

بھلا دھماکہ غان مسیت نا چھت تما، نمازیک کیرغ مسر،ریسکیو کارندہ غاک کشسا ہسپتال آ گدریفیر، دھماکہ ٹی 157 نا کچ بندغ ٹھپی مسنو، کیہی تا حالیت نازرک پاننگ انگ ءِ،حوال

0

Get real time updates directly on you device, subscribe now.

پشاور: ملک سعد شہید پولیس لائنز نا مسیت اٹی بظاہر خود کش دھماکہ ٹی پولیس کارندہ غاتون اوار60 بندغ شہید و 157 آن زیات ٹھپی مسنو۔ لیڈی ریڈنگ ہسپتال (ایل آر ایچ) نا ترجمان محمد عاصم نا رداٹ جلہو اٹی 60بندغ شہید و 157 ٹھپی مسنو ہرافتے ٹی کیہی نا حالیت نازرک پاننگ انگ ءِ۔ اوپارے کہ بھلا دھماکہ غان مسیت نا چھت تما ہراٹی نمازیک کیرغ مسر ہرافتے ریسکیو کارندہ غاک کشسا ہسپتال آ گدریفیر۔ ایل آر ایچ انتظامیہ شاری تیان دتر نا عطیہ تننگ نا خواست کرینے انتئے کہ ہسپتال اٹی ٹھپی تے دتر ناسخت گرج ءِ۔ ترجمان ٹھپی تا خاہوت آتیا زور شاغانے کہ او ہسپتال نا وارڈآتیٹی رش آن پاناد کیر تانکہ ایمرجنسی و ٹراما تون اوار چندی وارڈآتیٹی مون تروک آ ٹھپی تا درمان اٹی اڑاند پیش بف۔ وزیراعظم شہباز شریف پولیس لائنز پشاور نا مسیت اٹی خودکش دھماکہ نا ترندی اٹ مذمت ءِ کرسا پارینے کہ شاری تا ناحق خون ءِ وہیفوک آتے عبرت نا نشان جوڑ کینہ۔ دوشنبے نادے آ وزیراعظم آفس نا میڈیا ونگ آن جاری بیان اٹی وزیراعظم پارے کہ اللہ تعالیٰ نا حضور سربسجود مسلمان تا خون قرآن نا رغاموک آتیان چپ ءِ، اللہ نا اُراءِ شست کننگ داہیت انا شاہدی ءِ کہ جلہو گرآتا اسلام تون ہچ ءُ تعلق اس اف، دہشت گرد آک پاکستان نا دفاع ان فرض ءِ پورو کروک آتے شست کرسا خوف ودی کننگ خوارہ، پاکستان نا برخلاف جنگ کروک آتے چٹفنہ۔ وزیراعظم پارے کہ شاری تا ناحق خون ءِ وہیفوک آتے عبرت نا نشان جوڑ کینہ دہشت گرد ی نا چٹفنگ کن مچ آ قوم و ادارہ غاک یکسو ومتحد ءُ۔ مچ آ قوم تینا شہید آتے سلام عقیدت پیش کیک۔ وزیراعظم پارے کہ خیبرپختونخوا ٹی امن و ایمنی نا بگڑینگوک آ حالیت آتیا جوان حکمت عملی اس تینا کینہ، بنجا صوبہ غاتے انسداد دہشت گردی نا لائخی تے ودفنگ اٹ کمک کیک۔ وزیراعظم بنجائی وزیر داخلہ ءِ پارت کرینے کہ صوبہ غاک خاص وڑاٹ خیبرپختونخوا کاؤنٹر ٹیررازم ڈیپارٹمنٹ نا لائخی تے ودفنگ اٹ کمک فراوان کیر۔ وزیراعظم شہید آتا درجہ غاتا بڑزی، خاہوت کن صبر و ٹھپی تا زوت دراخ جوڑی کن دعا کرے۔ مسکوہی صدر آصف علی زرداری پشاور اٹی خودکش دھماکہ نا مذمت ءِکرینے۔ میڈیا سیل بلاول ہاؤس نا کنڈ آن جاری بیان نا رداٹ مسکوہی صدر آصف علی زرداری پارینے کہ خیبرپختونخوا ٹی دہشت گرد آتا سرگرم مننگ بھاز خطرناک ءِ، حکومت نیشنل ایکشن پلان آ عمل کرسا دہشت گردی نا نرسری تے بھس کے۔ اوپارے کہ ضمنی و لس گچین کاری تیان مست دہشت گردی نا واردات آک گڑتی نا سوب ءُ، بنجائی و صوبائی نگران حکومت دہشت گردی نا ڈٹ جوڑ کروک و کمکار آتے کانود نا گرفت اٹی اتیر۔ چیئرمین سینیٹ محمد صادق سنجرانی، ڈپٹی چیئرمین سینیٹ سینیٹر مرزامحمد آفریدی، قائد ایوان سینیٹ سینیٹر اسحاق ڈار و قائد حزب اختلاف سینیٹ سینیٹر ڈاکٹر شہزاد وسیم اسک پشاور اٹی پولیس لائنز نامسیت اٹی دھماکہ نا ترند انگا لوز آتیٹی مذمت ءِ کرسا پارینو کہ دہشت گرد آک تینا ناپاک مسخت آتیٹی سرسہب مننگ کپسہ، مچ آ قوم دہشت گردی نا برخلاف اسٹ ءُ۔ سینیٹ سیکرٹریٹ آن جاری بیان نا رداٹ چیئرمین سینیٹ محمد صادق سنجرانی پارے کہ دہشت گرد آک تینا ناپاک مسخت آتیٹی اسُل سرسہب مننگ کپسہ۔ دہشت گردی نا برخلاف پاکستان نا حکومت، سیکورٹی ادارہ غاک، الس و پارلیمان نا عزم بدل مفک۔ دہشت گردی نا واقعہ غاک ننا حوصلہ ءِ شیف شاغنگ کپسہ۔ دہشت گرد آک تخریبی کارروائی تے اٹ پاکستان اٹی شونداری نا عمل ءِ لتاڑنگ نا بے سہب کوشست کننگ اٹی ءُ۔ پاکستان دہشت گردی ءِ ماس کش کننگ کن سنبرینگوک ءِ۔ چیئرمین سینیٹ دھماکہ ٹی ٹھپی مروک آتا زوت دراخ جوڑی کن دعا کرے۔

گڈیکو حوال آتا ر داٹ شہید مروک آتا جم کچ 93 اسکان سر مسنے۔

(اے پی پی)

Get real time updates directly on you device, subscribe now.

Leave A Reply

Your email address will not be published.