کوئٹہ ٹی پی ایس ایل نمائشی میچ 5 فروری آ مریک، بست و بند آک پورو

کوئٹہ : وزیراعلیٰ بلوچستان میر عبدالقدوس بزنجو نا پارت آ اسہ دیوان اسے کوئٹہ ٹی 5 فروری آ اڈ ہلوک کرکٹ میچ انا بست و بند آتا جاچ ہلنگا، وزیر اعلیٰ نا پرنسپل سیکریٹری عمران گچکی دیوان نا کماشی ءِ کرے، وخت اس کہ تعلقدار محکمہ و ادارہ غاتا کمامدار آک دیوان اٹ ساڑی ئسر۔دیوان اٹ کرکٹ اسٹیڈیم نا بیرفنگ، سیکورٹی، سیلی تا پترینگ، گوازی گر تا رہینگ، کوریج و ٹریفک نا بست و بند آتا جاچ ہلنگا۔ و دا رد اٹ تعلقدار کمامدار آتا کنڈ آن حوال تننگا۔ دیوان اٹی دا ہیت آ است جمی نا درشانی کننگا، کہ میچ انا جوان وڑ اٹ اڈ تننگ کن کل تیاریک پک دروشم ہلنگ اٹی ءُ۔ کرکٹ نا شوقی تے گچین چاگڑد اس جوان ءُ کرکٹ اس ہُننگ کن رسینگک۔ دا وخ تآ ہیت و گپ کرسا وزیراعلیٰ نا پرنسپل سیکریٹری پارے کہ کوئٹہ ٹی میچ وزیر اعلیٰ بلوچستان میر قدوس بزنجو نا خاص است خواہی نا سوب آن پک مننگ کرے، و وزیراعلیٰ نا است خواہی ئس کہ پی ایس ایل آن بیدس کوئٹہ ٹی ایلو جہانی میچ آک ہم مریر، نمائشی میچ انا رد اٹ دا اولیکو میچ ءِ۔ او پارے کہ کوئٹہ نا چاگڑد کرکٹ کن آئیڈیل ءِ، و داڑے تیرمہ ٹی ثمر کیمپ ہم لگنگ کیک، داڑکن پی سی بی تون ہیت و گپ مننگ اٹی ءِ۔ اومیت ءِ کہ نجم سیٹھی دا بابت تینا مثبت کڑد ءِ سر ایتک۔ او پارے کہ بلوچستان اٹی کرکٹ نا لائخ ءُ گوازی گر ارے، و اوفتا است بڈی اوفتے ملکی و جہانی کہول آ تیان کسب ءِ نشان تننگ نا بایدے وار رسینگے۔

(خ ن)