پاکستان چین سنگتی وخت اتون اوار پین سوگو مسنے،سید یوسف رضا گیلانی

قوفو، چین، چیئرمین سینیٹ سید یوسف رضا گیلانی پارینے کہ پاکستان و چین نا سنگتی پت، تین پہ تینی شرف، تین پہ تینی کمکاری و امن شونداری نا اسیجائی عزم آ استوار ءِ۔ کنفیوشس نا تعلیمات آک اینو ہم علم و تعلم، سنگتی، ہم گرنچی و تین پہ تینی شرف نا بابت بھلو اہمیت اس تخرہ۔ او دا ہیت ءِ چائنا انٹرنیشنل کنفیوشس کلچر فیسٹیول نا وخت آ تینا ویڈیو کلہو اٹ پارے۔ دا فیسٹیول چین نا تاریخی شار قوفو ٹی اڈ ہلک، ہرا عظیم مفکر و فلسفی کنفیوشس نا باوہ پیرہ ئی آشار ءِ۔ تینا کلہو اٹی چیئرمین سینیٹ فیسٹیول اٹی بشخ ہلوک، دانشور و شرفمند آ مہمان تے مبارکبادی ترسا پارے کہ کنفیوشس نا تعلیمات آک اینو ہم علم و تعلیم، سنگتی، گرنچی و تین پہ تینی شرف نا بابت بھلو اہمیت اس تخرہ۔ پاکستان و چین نا تعلقداری تا ذکر ءِ کرسا چیئرمین سینیٹ پارے کہ 2026ء ٹی ہڑتوم آ ملک آتا نیام اٹ سفارتی تعلقداری تا جوڑ مننگ نا 75 سال پورو مننگ ءِ۔ او پارے کہ ہڑتوم آ ملک آتا لازوال ”آہنی ایلمی“ آ تالان سنگتی وخت اتون اوار پین سوگو مسنے و ڈیہہ اٹی امن و سوگوی نا مون آ دننگ اٹ اہم کڑد ادا کننگ ءِ۔ چیئرمین سینیٹ پارے کہ تعلیم، دود و ربیدگ نا تبادلہ و السی رابطہ پاکستان و چین نا الس ءِ اسہ ایلو نا پین خڑک اتنگ اٹ اہم کڑد ادا کننگ ءُ۔ او پاکستانی یونیورسٹی تیٹی جوڑ کنفیوشس انسٹی ٹیوٹ آتا خذمت آتاستا ءِ کرسا پارے کہ دا ادارہ غاک چینی زبان و دود و ربیدگ نا مون آ دننگ و ہڑتوم آملک آتا الس نا نیام اٹ تین پہ تینی فہم و آگاہی ءِ ودفنگ اٹ اہم کڑد ادا کننگ ءُ۔ او ورناتے اسہ ایلو آن ہیل کننگ نا پین وارخواہی فراوان کننگ نا گرج آ زور شاغسا پارے کہ ادب، تعلیم، سائنس، ٹیکنالوجی و دود و ربیدگ نا بشخ آتیٹی رابطہ و ہن و بر ءِ پین مون آ دننگے۔