جان جوڑی قومی سلامتی و زرگزران نا ہم ویل اسے‘ مصطفی کمال

اسلام آباد، بنجائی وزیرِ جان جوڑی مصطفیٰ کمال پارینے کہ جان جوڑی پاکستان نا بیرہ انتظامی ویل اف بلکن قومی سلامتی و قومی زرگزران نا ہم اہم ویل ءِ۔ پاکستان اٹ ناجوڑی تا زیات مروک آ بھاریم نا سوب آن ہیلتھ کیئر سسٹم آ زورزیات مننگ ءِ، ہراڑتون مون تننگ کن ناجوڑی تا درمان تون اوار اوار اوفتا بنداوی سوب آتیا چکار کروئی مریک۔ دا خیال آتا درشانی ءِ او انٹرنیشنل کانفرنس آف لائف اسٹائل میڈیسن آن تران کرسا کرے۔ بنجائی وزیرِ جان جوڑی پارے کہ بیرہ پین ہسپتال و ڈاکٹر زجوڑ کننگ ودوک آ ناجوڑی تا ویل آتا آخبتی ایسر اف۔ ناجوڑی تا زیات مروک آ بھاریم ءِ کم کننگ کن احتیاط، ناجوڑی تیان بچنگ و جان جوڑی نا مون آ دننگ آ خاص چکار کروئی مریک۔ او پارے کہ لائف اسٹائل میڈیسن ءِ پائیدار جوڑ کننگ و دا بابت شعور ہر بندغ اسکان سرکنگ المی ءِ۔ لائف اسٹائل میڈیسن نا مضمون ءِ مون آ دننگ کن پاکستان میڈیکل اینڈ ڈینٹل کونسل (پی ایم ڈی سی) ٹی گام گیج کننگانے۔ مصطفی کمال پارے کہ پی ایم ڈی سی ٹی لائف اسٹائل میڈیسن نا کورس انا اوار کننگ و دا بابت کمیٹی نا جوڑ کننگ نا کاریم پورو مسنے۔