بنجائی حکومت نا کنڈ آن بجلی و گیس دزی نا توننگ کن گام گیج آتا بنا

کوئٹہ : بنجائی حکومت نا پارت آ صوبائی دارالحکومت تون اوار مچ آ صوبہ گیس و بجلی دزی نا توننگ کن گام گیج نا بنا ءِ کرینے۔ اولیکو مرحلہ ٹی کوئٹہ و ہیب کیب نا کمرشل اُرا و سرکاری محکمہ غاتا میٹر آتے چانڑ کننگک۔ کمامدار آتیان سما تمانے کہ بنجائی حکومت گیس و بجلی دز آتا برخلاف سخت و فیصلہ کن کارروائی نا پارینے و دا بابت اٹ کس اسے تون ہچ ءُ رعایت اس کننگپک۔ حوال نا رداٹ گیس دز آتا برخلاف کارروائی ٹی سوئی گیس کمامدار آتون ایف آئی اے کمامدار آک ہم کمک کیرہ۔ اوفتے دا بابت اٹ خاص ءُ ٹاسک اس تننگانے۔ حوال نا رداٹ دا وخت آ صوبائی دارالحکومت تون اوار مچ آ صوبہ ٹی بھلو کچ اسے ٹی گیس دزی کننگ انگ ءِ۔ حوال نا رداٹ گیس کمپنی ءِ ریکوری کوئٹہ ہیب کیب آن مریک صوبہ نا تہہ آن ریکوری مفننگ نا وڑ اٹی ءِ وخت اس کہ کوئٹہ نا ہیب کیب نا علاقہ غاتیٹی میٹرر ریڈر خلیرہ۔ حوال نا رداٹ کہ خلق آک تینا جاگہ غا شار انا نیام انا ہم صارف آتیان تینا میٹر آتے بند کرینو۔ ہرانا سوب آن گیس کمپنی ءِ سالانہ کروڑ آ روپئی تا نسخان ہرفوئی تمنگ ءِ۔ سوئی گیس کمامدار آک دا بابت اٹ پارینے کہ گیس دز آتا برخلاف بھلو کچ اسے ٹی کریک ڈاؤن بنا کرینے و گیس دز آتا برخلاف سوئی گیس ایکٹ نا رداٹ کارروائی کننگک۔

(آن لائن)