حکومت و اپوزیشن اسیجا تولسا پوسکن ءُ میثاق جمہوریت اس کیر،مولانا فضل الرحمان

اسلام آباد، جمعیت علماء اسلام (ف) نا سروک مولانا فضل الرحمان پارینے کہ حکومت خیبرپختونخوا ٹی گورنر راج و ایمرجنسی نا باندات آ آئین ءِ غلط کاریم اٹ ایس زور انا زی آ اقتدار ءِ بدل کننگا و آئین نا آرٹیکل 2 اے ءِ گوجالسا غیر سیاسی گام ہرفنگا‘ او حکومت و اپوزیشن ءِ مذاکرات نا میز آ تولسا پوسکن ءُ میثاقِ جمہوریت اس کننگ نا سلہ خلسا پارے کہ پارلیمنٹ الس نا نمائندہ ادارہ ءِ، ولے ملک اٹی سگ انا واک چٹسا ہننگ اٹی ءِ و باندات آک پدریسہ خراب مننگ اٹی ءُ۔ قومی اسمبلی ٹی تینا خیال آتا درشانی ءِ کرسا مولانا فضل الرحمان پارے کہ ہراتم پی ٹی آئی نا لانگ مارچ اسلام آباد نا کنڈ آ بسکہ تو پی ٹی آئی نا راہشونک اوڑتون حوال کرسا پاریر کہ دا باندات آ اونا ہم کڑد اس مرے۔ ایلو دے آ اوڑدہی مس‘ ہراٹی رانا ثناء اللہ ہم ساڑی ئس و دا سرحال آ جم گپ و تران مس۔ جے یو آئی نا سروک پارے کہ اوفتا جماعت شہید آتا جماعت ءِ و اوفتا قربانی تیا ملنڈ کننگا۔ او سوج کرے کہ مگہ بنجا ملک اٹی امن و امان ءِ برجا تخنگ اٹی سرسہب ءِ؟ او خبڑدار کرے کہ اگہ حکومت بیداد نا کسر ءِ ہرفے تو اونا پد بھاز خراب مننگ کیک۔ مولانا فضل الرحمان معدنیات نا باندات آ ہم حکومت آ تنقید کرسا پارے کہ جماعتی واک ءِ حکومتی ودیکاری تے توننگ کن مون آ اتنگ انگ ءِ‘ او پارے کہ ننا جماعت ہچ ءُ ودیکاری اس کتنے‘ او پارے کہ اگہ حکومت جھیڑہ کن سنبرینگوک ءِ تو نن ہم داڑکن سنبرینگوک تولوک اُن۔ او مستی پارے کہ بھلو وخت اسے آن جنگ متنے، ہندا سوب آن جوان انگا کسر ہندادے کہ حکومت و اپوزیشن اسہ میز آ تولر و پوسکن ءُ میثاق جمہوریت اس کیر، ہراٹی ہڑتوم آ فریق آک اوار مریر۔ او پی ڈی ایم نا ساڑی حالیت آتیا ہم تنقید کرے۔ دیوان ناوخت آ اسپیکر قومی اسمبلی مولانا فضل الرحمان نا گڑاس لوز آتے کارروائی آن کشا۔