ہرنائی ٹی سم کاری نا واقعہ اسے ٹی 4 کانکن زوال، 3 ٹھپی

کوئٹہ : بلوچستان نا علاقہ ہرنائی ٹی نادرست بند غ آتا سم کاری آن 4 کانکن زوال وخت اس کہ 3 ٹھپی مسر۔ لیویز حوالی نا رداٹ دوشنبے نادے آ بلوچستان نا علاقہ ہرنائی خوست کوئل مائنز ایریاٹی نادرست سلہہ بند بندغ آک کولا نا کانڑ اٹی کاریم کروک آ کانکن آتا ڈیرہ غا اناگت سم کاری کریر ہراڑان 4 کانکن زوال و 3 ٹھپی مسر۔ زوال مروک آتا درستی راستی نورخان، عبدالحنان، سید حنان، عبدالرحمان نا پن تے اٹ مس وخت اس کہ ٹھپی مروک آتیٹی شیرزمان، سید اکرم و باز محمد اوار ءُ۔ لاش و ٹھپی مروک آتے دمدستی وڑاٹ خوست ہسپتال آ گدریفنگانے۔ سلہہ بند بندغ آک 11 کولاکانڑ ہشار۔ وزیراعلیٰ بلوچستان میر عبدالقدوس بزنجو خوست اٹی کانکن آتیا سم کاری نا واقعہ نا مذمت ءِ کرے۔ اومذمتی بیان اٹی پارے کہ غریب و بے قصور خواری کش آتے خلوک آک انسان پاننگ نا لائق افس داوڑنا نفرت نا قابل عمل اٹ اوار زموار آک سخت سزا نا حقدار ءُ۔ اوپارے کہ دنیا نا اسہ مذہب و راج اس ہم بے گناہ بندغ آتا دتر ءِ وہیفنگ نا موکل تفک۔ اوانتظامیہ ءِ مائننگ نا علاقہ غاتیٹی سیکورٹی ءِ پین سخت کننگ و دہشت گردی نا بدترین واقعہ ٹی اوار زموار آتا دزگیری کن غٹ وسیلہ غاتے کاریم اٹ اتنگ نا پارت کرے۔ وزیراعلیٰ بلوچستان میر عبدالقدوس بزنجو زوال مروک کانکن آتا خاہوت آتون ہڑزخواہی و ہمدردی نا درشانی ءِ کرسا پارے کہ حکومت خاہوت آتا پبی کمک ءِ کیک۔ اوایماندار تا بخشش و خاہوت آتیکن صبر و جمیل نا دعا کرے۔ صوبائی وزیر داخلہ میر ضیاء اللہ لانگو نا ہرنائی خوست انا علاقہ ٹی نادرست بند غ آتا سم کاری ناواقعہ غا است ہسونی نا درشانی ءِ کرسا تعلقدار کمامدارآتیان رپورٹ بٹنگا۔ وزیرداخلہ نا زوال مروک بندغ آتا خاہوت آتون ہڑزخواہی کرسا انتظامیہ ءِ پارت کرے کہ دمدستی وڑاٹ دوبہ دارآتا دزگیری کن غٹ وسیلہ غاتے کاریم اٹ اتنگے۔ وزیرداخلہ بلوچستان مستی پارے کہ امن ءِ کس اسے بھس کننگ کن الیپنہ داوڑنا واقعہ غاتے سجفوک ءُ ڈٹ اسے نا رداٹ کننگ انگ ءِ، وزیرداخلہ بلوچستان زوال مروک بندغ آتا درجہ غاتا بڑزی و ٹھپی تا زوت و پورو دراخ جوڑی کن دعا کرے۔

(اے پی پی)