قطبی وزیرستان، فورس و دہشتگرد آتا جنگ، 2 ورنا شہید

راولپنڈی: قطبی وزیرستان اٹ فورس و دہشت گرد آتا نیام اٹ جنگ اٹ پاک فوج انا اِرا ورنا شہیدمسر وخت اس کہ ورندی کارروائی ٹی 2 دہشتگرد ہم خلنگار۔ پاک فوج انا شعبہ تعلقات عامہ (آئی ایس پی آر) نا رد اٹ فورس آک قطبی وزیرستان نا علاقہ اسپن وام اٹ کارروائی کریر دا وخت آ فورس و دہشت گرد آتا نیام اٹ سم کاری مس ہرانا سوب آن 2 دہشتگرد خلنگار۔ آئی ایس پی آر نا رد اٹ دہشتگرد آتا سم کاری آن سپاہی عمران اللہ و سپاہی افضل خان شہید مسر۔ آئی ایس پی آر نا رد اٹ سکیورٹی فورس آک گچین وڑ اٹ دہشتگرد آتا ہندجاٹ آتیا سر مسر‘ ہراکان بھلو کچ اسے ٹی سلہہ و منچر دوئی کننگا۔ وزیراعظم محمد شہباز شریف قطبی وزیرستان نا علاقہ اسپین وام اٹی دہشت گرد آتون اسہ ایلو آ سم کاری ٹی شہید مروک آ پاک فوج انا سپاہی عمران اللہ و سپاہی افضل خان ءِ خراج عقیدت پیش کرسا پارینے کہ مچ آ قوم شہید آتے سلام پیش کیک و تینا سیکورٹی فورس آتون ہم کوپہ سلوک ءُ۔ دوشنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم دہشت گرد آتا برخلاف سرسہب کارروائی آ سیکورٹی فورس آتے خراج تحسین پیش کرے۔ اوپارے کہ ننا سلہہ بند فوج و کانود نافذ کروک آ ادارہ غاک دہشت گرد آتا ناپاک مسخت آتا کسر اٹ اینی ءُ دیوال ءُ، مچ آ قوم شہید آتے سلام پیش کیک و تینا سیکورٹی فورس آتون ہم کوپہ سلوک ءُ۔ اوشہید آتا درجہ غاتا بڑزی کن دعا و خاہوت آتون ہڑزخواہی کرینے۔ اسپیکر قومی اسمبلی راجہ پرویز اشرف و ڈپٹی اسپیکر زاہد اکرم درانی ئسک قطبی وزیرستان اٹی فوجی قافلہ غا دہشت گرد آتا جلہو نا مذمت ءِ کرسا 2 سیکورٹی فورس آتا کارندہ غاتا جانی نسخان آ ڈکھیائی و است ہسونی نا درشانی ءِ کرینے۔ دوشنبے نادے آ تینا اسہ بیان اسے ٹی اوفک شہید آتا خاہوت آتون ہڑزخواہی و ہمدردی نا درشانی ءِ کریر۔ اوفک پاریر کہ دہشت گرد آتا لغور انگا کارروائیک سیکورٹی فورس آتا دہشت گردی نا برخلاف بدل مفروک عزم ءِ متزلزل کننگ کپسہ۔ اوفک پاریر کہ وطن نا دفاع نا خاطر تینا جان تے ندر کروک آ نرزور گلزادہ غاتیا مچ آ قوم گمر کیک۔ اوفک دعاکریر کہ اللہ تعالیٰ شہید آتا درجہ غاتے بڑز و پدسلوک آ خاہوت آتے دا بے بدل نسخان ءِ سگنگ کن صبر وجمیل عطاکے۔

/ اسلام آباد (آن لائن/ اے پی پی)