جامعہ بلوچستان اٹ اودیم کیمرہ غاتیان ویڈیو جوڑ کننگ نا دوبہ پک

کوئٹہ( آن لائن ) جامعہ بلوچستان اٹ اودیم کیمرہ غاتیان ویڈیو جوڑ کننگ نا دوبہ پک، ایف آئی اے نا رپورٹ اٹ مونی بروک سلاہ سوج آتا رداٹ جامعہ بلوچستان نا سینڈیکٹ نا جامعہ نا اِرا کارندہ ءِ ملازمت آن برطرف کننگا، اِرا ملازم نا اِرا اِرا سال نا انکریمنٹ آتے توننگ و بنجائی کڑد مسکوہی وی سی نا برخلاف گورنر بلوچستان آن جوڈیشل کارروائی و ایوارڈ و ٹائٹل آتے پدی ہلنگ نا خواست کرے۔ حوال نا رداٹ جامعہ بلوچستان نا 88 میکو سینڈیکٹ دیوان پروفیسر ڈاکٹرشفیق الرحمن نا کماشی ٹی اڈ ہلک ہراٹی جسٹس محمدہاشم کاکڑ، وزیراعلی نا سلاہکار بشری رند، روشن خورشیدبروچہ، ڈاکٹرسعود تاج، محمدایوب بلوچ، ڈاکٹرکلیم اللہ بڑیچ، پروفیسر باقی جتک ڈاکٹر فرید اچکزئی و ایلو باسک آک بشخ ہلکر حوال نا رداٹ دیوان نا ایجنڈا ٹی جامعہ بلوچستان ٹی جنسی ہراسگی سکینڈل نا بابت ایف آئی اے نا رپورٹ نا روشنائی ٹی فیصلہ کننگا، سینڈیکٹ ہراسگی کیس اٹ جامعہ بلوچستان اٹ خفیہ کیمرہ غاتیان ویڈیو جوڑ کننگ نا دوبہ پک مننگ آ یونیورسٹی نا چیف سیکورٹی آفیسر محمد نعیم (ریموول) و سیکورٹی گارڈ سیف اللہ ءِ ملازمت آن برخاست و مسکوہی رجسٹرار طارق جوگیزئی و مسکوہی ٹرانسپورٹ آفیسر شریف شاہوانی نا اِرا اِرا سال نا انکریمنٹ آتے توننگ نا سفارش کننگا وخت اس کہ سینڈیکٹ اٹ اسہ قرارداد اسے نا رداٹ خواست کننگا کہ مسکوہی وائس چانسلر ڈاکٹر جاویداقبال نا برخلاف جوڈیشل انکوائری کرسا اونا ایوارڈ و ٹائٹل آتے پدی ہلنگے، یات سلے کہ ہراسگی کیس بلوچستان ہائیکورٹ اٹ زیر سماعت ءِ، 30جون نا سماعت اٹ معزز عدالت یونیورسٹی انتظامیہ ءِ سینڈیکٹ دیوان اڈ ترسا ایف آئی اے نا رپورٹ آ کارروائی کننگ نا پارت کریسُس ولدا ہم ایف آئی اے نا مکمل رپورٹ داسکان کن مون آ بتنے، کانودی ماہر تا رداٹ سینڈیکٹ مسکوہی وائس چانسلر ڈاکٹر جاوید اقبال نا برخلاف کارروائی نا مجاز اف ہرانا بنداو آ چانسلر جامعہ بلوچستان و گورنر بلوچستان آن مسکوہی وی سی نا برخلاف کارروائی نا خواست کننگا، حوال نا رداٹ ایہن تو اِرا اودیم کیمرہ غاتیان جامعہ بلوچستان اٹ اودیم و خراب ءُ ویڈیو جوڑ کننگا ہرافتا کچ ءِ ایف آئی اے نا رپورٹ اٹ 12 پاننگاسُس۔ سیکورٹی گارڈ جامعہ نا سرویلنس روم نا کمپیوٹر آن یو ایس بی ٹی شاغسا مسکوہی وائس چانسلر ڈاکٹر جاوید اقبال اسکان سر کرے۔ یات سلے کہ ہراسگی سکینڈل نا مون آ بننگ آن پد بلوچستان نا طلبہ تنظیم آک جوان برانز کرسا معاملہ نا ساف جاست و پاست کننگ نا خواست کریسُر۔