بی این پی نا ہژدہمی ترمیم ءِ رول بیک کننگ نا پبی مخالفت ءِ کننگ نا فیصلہ

کوئٹہ( آن لائن )بلوچستان نیشنل پارٹی نا کوئٹہ ٹی ساڑی بنجائی کابینہ نا باسک آتیان سینٹرل کمیٹی و پارلیمانی باسک آتا اسہ اہم ءُ دیوان اس پارٹی نا بنجائی سینیر نائب صدر ملک عبدالولی کاکڑ نا کماشی ٹی اڈ ہلک ہراٹی پارٹی نا بنجائی سیکرٹری جنرل سینٹر ڈاکٹر جہانزیب جمالدینی، بنجائی فنانس سیکریٹری و صوبائی پارلیمانی لیڈر ملک نصیر احمد شاہوانی، مرکزی ھیومن رائٹس سیکریٹری موسی بلوچ، بنجائی نیاڑی سیکریٹری ایم پی اے زینت شاہوانی، بنجائی کمیٹی نا باسک آتیان نوابزادہ حاجی لشکری رہیسانی، ساجد ترین ایڈوکیٹ، غلام نبی مری، ایم پی اے و پبلک اکانٹس کمیٹی نا چیئرمین اختر حسین لانگو ،میر ہمایوں کرد، ایم پی اے شکیلہ نوید دیوار، میر جمال لانگو،قاری اختر شاہ کھرل ،ایم پی اے احمد نواز بلوچ، ایم پی اے ٹاہئٹس جانسن و ٹکری شفقت لانگو ہم بشخ ہلکر، دیوان اٹ ساڑی سیاسی حالیت آک، ہژدمی ترمیم ،این ایف سی ایوارڈ و تنظیمی ویل و ایلو سیاسی ویل آتا جاچ ءِ ہلنگا، پارٹی نا بنجائی سیکرٹری جنرل سینٹر ڈاکٹر جہانزیب جمالدینی دا ویل آتا بابت پارٹی نا بنجائی راہشون تے بریفنگ تس، دیوان اٹ پارٹی نا راہشونک پارینو کہ ہژدمی ترمیم ءِ رول بیک کننگ نا پالیسی و گام گیج آتا سخت و سیاسی وڑ اٹ مخالفت و مزاحمت ءِ کینہ و قوم تا حقیقی حق حکمرانی صوبائی مکمل خودمختاری ساحل وسائل آ واق و اختیار مننگ ننا پارلیمانی سیاسی جہد نا اولیکو ٹارگٹ ءِ۔ او دا مسخت نا پوروی کن ننا قومی آ راہشونک و سیاسی کارندہ غاک بھلو جہد اسے ٹی سخت انگا دے تے سگسا تینا مچ آ زند ءِ جہد اکن وقف کرسا بھلا بھلا طاقت آتا مون آ کاٹم ءِ شیف کننگ آن نمن مسر و تینا قومی چاہنداری و سلامتی تہذیب و تمدن ساحل و سائل و ڈیہہ انا رکھ انا ہژدمی ترمیم نا کمک اٹ صوبہ غاتے گڑاس وسیلہ تننگ نا جہد اٹ کل سیاسی جمہوری پارٹیک کڑد ادا کریر ولے داڑان بیدس صوبہ غاتے مکمل اختیار دوئی اف ولے اسہ وار ولدا اسہ سازش اسے نا رداٹ ہژدمی ترمیم اٹ بدلی اتنگ نا بحث آن صوبہ نا احساس محرومی ٹی ودکی مریک۔ او بنجا نا دو ٹی مروک آ طرز حکمرانی ءِ اولیت تننگ نا کوشست کننگ انگ ءِ، ہراڑان اسہ پُوسکن ءُ سیاسی کاختی اس ودی مریک دا وخت آ ملک اسہ نازرک سخت ءُ سیاسی زرگزرانی و راجی کاختی تا پلویڑ اٹی ءِ، ملک پین خراب ءُ حالیت ودی کننگ ءِ سگپک، کماش آک ہوش کیر، قوم تے و صوبہ غاتے پین دیوال اٹ خلپس و اوفتا حق آتے تروک آ پالیسی تا پد ءِ الے۔ او پارینے کہ این ایف سی ایوارڈ نا فنڈ آتا رداٹ بلوچستان نا کوٹہ غا پین کٹوئی ہچ ءُ وڑ اسے ٹی سگپنہ۔ امن و ایمنی نا پن آ این ایف سی ایوارڈ آن ارب آ روپئی تے بنجا نا کاریم اٹ اتنگ صوبہ نا غریب آ اُلس تون بیدادی اسے۔