پاکستان سعودی عرب تون ہر وڑ اٹ کمک ءِ برجا تخک، شاہ محمود قر یشی

 اسلام آباد(آن لائن )وزیر خارجہ مخدوم شاہ محمود قریشی تینا سعودی ہم منصب شہزادہ فیصل بن فرحان آل سعود تون ٹیلیفون آ حال احوال کرینے۔ ہراٹی کورونا دَین و تین پہ تینی اُست خواہی نا باندات آتیا ہیت وگپ کننگا۔ وزیر خارجہ تینا و وزیر اعظم عمران خان نا کنڈآن سعودی عرب نا فرمانروا شاہ سلمان بن عبدالعزیز نا جانجوڑی نا بابت اٹ جانپڑسی کرے۔ سعودی وزیر خارجہ وزیر خارجہ مخدوم شاہ محمود قریشی نا منتواری ءِ ہرفسا پارے کہ شاہ سلمان بن عبدالعزیز زارک انا سرسہب ءُ آپریشن اسے آن پد جانجوڑ مننگ اٹی ءِ۔ وزیر خارجہ اونا زوت اس جانجوڑی وہی انا مرغنی کن دعا کرسا اُست خواہی نا درشانی ءِ کرے۔ وزیر خارجہ تینا سعودی ہم منصب ءِ پاکستان نا کنڈآن کورونا دَین نا تالانی ءِ توننگ کن سمارٹ لاک ڈاون تون اوار ہرفوک آ جوان انگا گام گیج آتیا معلومدار کرے۔ شاہ محمود قریشی پارینے کہ وزیر اعظم عمران خان نا کنڈآن سمارٹ لاک ڈاون حکمت عملی نا سوب آن نہ بیرہ کرونا وائرس نا تالانی نا شرح کم مسنے وخت اس کہ مرک انا شرح ٹی ہم بھاز کمتی مسنے۔ سعودی وزیر خارجہ پارینے کہ سعودی عرب اٹ کورونا دَینی حالیت جوانی نا کنڈآ گام ہرفنگ اٹی ءِ۔ وزیر خارجہ شاہ محمود قریشی منہ وخت اٹ سعودی عرب نا رکھوک آ سلہہ تیا حوثی ملیشیا نا کنڈآن کروک آ میزائل جلہو آتا مذمت ءِ کرسا پاکستان نا حکومت و اُلس نا کنڈآن سعودی حکومت و اُلس تون اُست خواہی کرے۔ او پارینے کہ پاکستان سعودی عرب نا علاقائی سالمیت نا رکھ اکن ہر وڑ نا کمک کرسا کیک۔