سانحہ9مئی‘سکیورٹی ٹی بے سہبی آ لیفٹیننٹ جنرل و مسہ پین افسر برخاست

راولپنڈی :  پاک فوج انا شعبہ تعلقات عامہ (آئی ایس پی آر) نا ڈائریکٹر جنرل میجر جنرل احمد شریف پارینے کہ فوجی ملکیت آتا سکیورٹی ءِ برجا تخنگ اٹ بے سہبی آ لیفٹیننٹ جنرل تون اوار 3 افسر ءِ نوکری آن برخاست کننگانے وخت اس کہ سانحہ 9 مئی ءِ گیرام کننگپک و زموار بندغ و ڈٹ بندی کروک آتے اسُل بشخنگپک۔ جنرل ہیڈکوارٹر (جی ایچ کیو) راولپنڈی ٹی پریس کانفرنس کرسا ڈی جی آئی ایس پی آر پارے کہ پریس کانفرنس نا مسخت 9 مئی نا واقعہ غاتا بابت معلومدار کننگ ءِ‘ 9 مئی نا واقعہ غاک پک کریر کہ ہرا کاریم ءِ دشمن کننگ کتو‘ منہ شرپسند کریر‘ 9 مئی نا سانحہ پاکستان نا برخلاف بھلو سازش اس ئس‘ دا سازش کن سوشل میڈیا غا دروغ تالان کننگا‘ ڈی جی آئی ایس پی آر پارے کہ داوخت اسکان نا جاست پاست آن بھاز آ شاہدیک رسینگانو و رسینگ انگ ءُ۔ پاک فوج ہڑدے عظیم شہید آتا جنازہ غاتے ہرفنگ اٹی ءِ‘ ہڑدے نابنداو آ دہشت گردی ءِ چٹفنگ انگ ءِ۔ 9مئی آ پاکستان نا شہید آتا خاہوت آتا است آزاری کننگا شہید آتا خاہوت آک بھاز سخت ءُ سوج کننگ اٹی ءُ کہ گڑا ننا تیناک قوم اکن ہندا سوب آن قربانی تسنو‘ شہید آتا تینائیک سوج کننگ ءُ کہ زموار آتے ہراتم کانود نا رد اٹ سزا تننگک‘ آرمی نا کل رینک آک سوج چست کننگ ءُ کہ ننا شہید آتا دا وڑ بے شرفی مننگ اٹی ءِ تو ننے جان ندر کننگ نا انت گرج ءِ۔ ڈی جی آئی ایس پی آر پارے کہ ہندا سال اٹ 95 افسر وورنا شہید مسر‘ اوپارے کہ دہشت گردی نا برخلاف سرسہب جنگ آخریکو دہشت گرد نا چٹفنگ اسکان برجا سلک‘ پاک فوج ملک انا رکھ و الس نا آسراتی کن قربانی ترسا کیک‘ الس نا پت انا حالیت انت کہ مرے فوج قربانی تننگ آن تینے پد توپک‘ حالیت آک امر کہ مریر پاک فوج تینے پد توپک۔ او پارے کہ سانحہ 9 مئی ءِ گیرام کننگپک‘ زموار بندغ آتے اسُل بشخنگپک و اوفتے پاکستان نا آئین وکانود نا رد اٹ سزا تننگک‘ داعمل ءِ ایسر اسکان سر کننگ اٹ اڑاند شاغوک آتابرخلاف سخت کارروائی کننگک۔ ڈی جی آئی ایس پی آر پارے کہ فوج تینا خود احتسابی مرحلہ ءِ پورو کرے‘ جم احتسابی عمل آن پد فیصلہ کننگا کہ سکیورٹی ٹی بے سہبی نا زموار آتا برخلاف کارروائی کننگے‘ فوجی ملکیت و جی ایچ کیو نا سکیورٹی نا زموار آتا برخلاف کارروائی کننگانے‘ اسہ لیفٹیننٹ جنرل تون اوار 3پین ءِ عہدہ غان برخاست کننگانے۔ ڈی جی آئی ایس پی آر پارے کہ فوجی عدالت آتے ٹی 102 شرپسند نا ٹرائل مننگ اٹی ءِ و دا برجا سلک‘ فوج اٹ خود احتسابی نا عمل بے فرق آن پورو کننگک۔ اوپارے کہ ملٹری کورٹ آتا بابت سپریم کورٹ اٹ کیس چلینگ انگ ءِ‘ دا وخت آ مچ آ ملک اٹ 17 اسٹینڈنگ کورٹ کاریم کننگ اٹی ءُ‘ ملٹری کورٹ آک 9 مئی آن پد جوڑ متنو‘ دا مست آن ساڑی و فعال ئسر‘شاہدی و کانود نارد اٹ سول کورٹ آک دا کیس تے ملٹری کورٹ آتیا گدریفیر‘ شاہدی تے ہننگ آن پد کانود نا رد اٹ سول کورٹ آک دامقدمہ غاتے ملٹری کورٹ آتیا راہی کرینو‘ دا کل دوبہ دار آتے پورو کانودی حق دوئی ارے‘ اوفتے اپیل کننگ نا حق ہم ارے‘ دا دوبہ دار آک سپریم کورٹ اٹ ہم اپیل کننگ کیرہ۔

(مانیٹرنگ ڈیسک)