بلوچستان نا شونداری کن بنجائی حکومت گام گیج کننگ ءِ‘ مولانا واسع

کوئٹہ : جمعیت علماء اسلام بلوچستان نا صوبائی امیر وبنجائی وزیر ہاؤسنگ اینڈ ورکس مولانا عبدالواسع پارینے کہ پاکستان ءِ شونداری و شونہالی ناکسر آ روان کننگ کن بنجائی حکومت عملی گام گیج کننگ اٹی ءِ‘ جمعیت علماء اسلام صوبہ ناکل آن بھلا سیاسی ومذہبی جماعت ءِ‘ ہرا مدام الس نا حق و صوبہ نا ترجمانی کن تینا حق ءِ ادا کرینے‘ بروک آ لس گچین کاری تے ٹی جمعیت علماء اسلام اسہ بھلو واک اس جوڑ مریک و لس گچین کاری تے ٹی جمعیت سرسہبی دوئی کرسا صوبہ ٹی حکومت جوڑ کیک و الس نا ویل آتے ایسر کننگ کن تینا کڑد ءِ ادا کیک۔ دا خیال آتادرشانی ءِ او تینا ہنکین اٹ پارٹی نا عہدیدار و کارندہ غاتیان تران کرسا کرے‘ اوپارے کہ ساڑی حکومت تدوک آ یک ونیم سال اٹ بھاز سخت ءُ فیصلہ کرے و ملک ءِ تنکی تیان کشنگ کن تینا کڑد ءِ پبی وڑ اٹ ادا کرے‘ اینو ملک داخس لائخ مسنے کہ بنجائی حکومت بجٹ ہم پیش کرے ومنظور ہم کرے تے و بروک آ دے تے ٹی الس ءِ ریلیف رسیفنگ کن تینا کڑد ءِ ادا کینہ‘ او پارے کہ جمعیت علما اسلام الس نا حق آتیا ہچ گہس سمجھوتہ کپک و نئے الس ناحق آتیا چپ تولک۔ اوپارے کہ پاکستان تحریک انصاف و ملک دشمنک پاکستان ءِ تنکی تا گواچی کننگ کن کڑد ادا کرینو و ملک ءِ شونداری وشونہالی آ روان خننگ آ اوفتا ہوغنگ پٹنگ بنا کرینے۔ الس نا ارغ ءِ پلوک آک اینو بنجائی حکومت آ تنقید کننگ اٹی ءُ‘ اینو معاہدہ غا ہمو غوغا کننگ ءُ ہرافک تینا ہندا معاہدہ ءِ کریسر‘ تینٹ معاہدہ ءِ پرغار و ملک ءِ ڈیفالٹ کننگ نا سازش کریر ولے بنجائی حکومت حالیت آتتون مون تس و ملک ءِ شونداری وشونہالی نا کسر آروان کننگ کن بھاز بھلو قربانی تسنے۔

(آن لائن)