بشام نا پِر تیان مست کل گام گیج آتے کننگے‘رمضان پلال

کوئٹہ : ڈپٹی کمشنر جھل مگسی محمد رمضان پلال نا کماشی ٹی برجا سال بروک آ بشام نا پیشگی پِرتا گام گیج آتا بابت لائن ڈپارٹمنٹ آتا آفیسر آتا اسہ اہم ءُ دیوان اس اڈ ہلک۔ دیوان اٹی اسسٹنٹ کمشنر گنداواہ عبدالحمید کورائی، ضلعی ناظم جان جوڑی ڈاکٹر رخسانہ مگسی، ڈپٹی ڈائریکٹر سوشل ویلفیئر حفیظ اللہ کھوسہ، تحصیلدار گنداواہ ہادی بخش پہوڑ، ایس ڈی او ایریگیشن فرخ کھوکھر وایلو لائن ڈپارٹمنٹ آتا آفیسر آک بشخ ہلکر۔ ڈپٹی کمشنر جھل مگسی محمد رمضان پلال دیوان اٹی بشخ ہلوک آتیان تران کرسا پارے کہ بشام نا پِر تیان وخت آن مست غٹ تر گام گیج آتے کننگ بھاز المی ءِ انتئے کہ تدوک آ سال بروک آ تاریخ نا بدترین نوکاپ و بشام نا خطرناک بھسکاری پِر تا سوب آن ضلع نا انفراسٹرکچر ءِ بھاز بے وڑ نسخان نا گواچی کریسس مواصلاتی نظام درہم برہم مسوسس، مخلوق نا مال و متاع ءِ بھاز نسخان رسینگاسس۔ ہزار آتا کچ اٹ ہند آک بھس و تماسر واٹرچینل آک بھس مسوسر، ہرانا سو ب آن کنوئی آ دیر انا بھاز تنکی ودی مسوسس نوکاپ نا سوب آن چندی خطرناک ناجوڑی ودی مسوسس خاص وڑاٹ موذی مرض ملیریا وڈائریا اسہ دین اسے آنبار تالان مسوسر اسکول وا یلو سرکاری ماڑیک بھس و تمار ضلعی انتظامیہ لائن ڈپارٹمنٹ آتون اواری اٹ دا غٹ ہندا چیلنج آتون مو ن ترسا ہر ممکن گام گیج کرے، میڈیکل کیمپس، فلڈ ریلیف، واٹر چینل و مواصلاتی نظام نا بحالی کن دے ونن کوشست کریر ہرا ستاکڑزوک ءُ گام اسے۔

(اے پی پی)