تعلیمی ادارہ غاتے ایس او پی تا رد اٹ ملنگ کن گام گیج کننگے، لشکری رئیسانی

کوئٹہ (آن لائن) بلوچستان نیشنل پارٹی نا بنجائی راہشون نوابزادہ میر لشکری رئیسانی پارینے کہ مہالو دہشتگردی نا پن آ بلوچستان اٹ الس نا زند ءِ ژند کننگا داسہ کورونا گردی نا پن آ صوبہ نا ورناتا تعلیم ءِ بھس کننگ نا کوشست کننگ انگ ءِ‘ سلیکٹڈ ومصنوعی حکومت آک دمدستی تعلیمی کانفرنس اڈ ایتر و تعلیمی ادارہ غاتے ایس او پی تا رد اٹ ملنگ کن گام گیج کیر تاکہ طالب علم آتا نسخانک پورو مننگ کیر‘ صوبہ ٹی بیرہ 14درسَد آبادی تون انٹرنیٹ نا آسراتی ارے وخت اس کہ ایلو 86درسَد آبادی انٹرنیٹ نا آسراتی تیان محروم ءِ‘ آن لائن کلاس آک راگ و بلوچستان نا طالب علم آتیا ملنڈاسے۔ دا خیال آتا درشانی ءِ او بی ایس او ناکنڈآن اڈ تروک کیمپ اٹ میڈیا تون ہیت وگپ کرسا کرے‘ دا وخت آ بی این پی نا بنجائی راہشون میر ہمایوں عزیز کرد، جاوید بلوچ، فارو ق شاہوانی، بی ایس او نا بنجائی سیکرٹری جنرل منیر جالب بلوچ، نائب چیئرمین خالد بلوچ، انفارمیشن سیکرٹری ناصر بلوچ، عاطف حمید رودینی، پشتون اسٹوڈنٹس فیڈریشن نا صوبائی چیئرمین عالمگیر خان مندوخیل، پشتونخوا اسٹوڈنٹس آرگنائزیشن نا ملک عمر کاکڑ وایلوفک ہم ساڑی ئسر۔ نوابزادہ میر لشکری رئیسانی پارے کہ اینو صوبہ نا طالب علم تنظیمک تینا کانودی حق آتیکن جہد کننگ اٹی ءُ نن داڑے اوفتتون یکجہتی نا درشانی کن بسونن‘ دا طالب علم آتا بقا نا ویل ءِ و او تینا بروک آچین انا ہیت ءِ کننگ اٹی ءُ۔ اوپارے کہ نن سلیکٹڈ ومصنوعی حکومت آن خواست کینہ کہ دمدستی تعلیم نا بابت کانفرنس اڈ تننگے ہراٹی غٹ اسٹیک ہولڈر آک اوارمریر و ایس او پی تے پک کرسا تعلیمی ادارہ غاتے ملنگے۔ نن طالب علم تنظیم تا روا انگا خواست آتا ہر فورم آ مخ تفی ءِ کینہ۔