وزیراعظم نا سپریم کورٹ ازخود نوٹس نا بنچ آ گڑتی

اسلام آباد : وزیراعظم شہباز شریف سپریم کورٹ نا ازخود نوٹس آ ٹہیفوک بینچ آ گڑتی درشان کرسا پارینے کہ حکومتی سیوتی و پی ڈی ایم اٹ اوار جماعت آتتون سلاہ کینہ۔ اوپارے کہ گچین کاری کرفنگ الیکش کمیشن ناکاریم ءِ‘ الیکشن کمیشن انت کہ فیصلہ کرے حکومت عمل کیک۔ صدر نا الیکشن کمیشن آ راہی کروک چٹھی غیر آئینی ءِ‘ صدر ارا وار آئین ءِ پرغانے‘ پی ٹی آئی نا جیل بھرو تحریک بے سہب مسنے۔ حوال نا رد اٹ وزیراعظم شہباز شریف ناکماشی ٹی سیاسی حالیت آتیا پارٹی راہشون تا اہم ءُ سلابتی دیوان اس اڈہلک‘ ہراٹی سپریم کورٹ نا ازخود نوٹس نا جاچ ءِ ہلنگا‘ حوالی نارد اٹ دیوان اٹ سپریم کورٹ نا ازخود نوٹس آ ٹہیفوک بینچ آ ہم گڑتی درشان کننگا وخواست کننگا کہ سپریم کورٹ نا اِرا جج ن لیگ نا بابت کیس تیان پیش تمر۔ حوالی نا رد اٹ وزیراعظم سپریم کورٹ نا ازخود نوٹس آ بینچ ٹہیفنگ آ سیوتی تتون سلاہ کننگ نافیصلہ کرینے‘ وزیراعظم حکومتی سیوتی و پی ڈی ایم اٹ اوار جماعت آتتون سلاہ کیک۔ پنجاب و خیبر پختونخوا ٹی گچین کاری تا بابت ہم سلاہ کننگک‘ ملکی امن ایمنی نابابت اے پی سی اڈتننگ نابابت امور تیا ہم گپ وتران کننگک۔ حوالی نا رد اٹ دیوان اٹ صدر مملکت ناکنڈآن گچین کاری تا تاریخ تننگ ناپڑو ءِ غیرآئینی گوندنگا‘ دیوان اٹ وزیراعظم صدر آ چٹھی راہی کننگ نا بابت پارٹی نا کانودی سلاہکار تتون سلاہ کرے۔ وزیراعظم چٹھی نا ٹک آتیا پارٹی راہشون تے پت اٹ ہلک۔ وزیراعظم دیوان اٹ تینا خیال آتا درشانی ءِ کرسا پارے کہ صدر مملکت نا کنڈآن الیکشن کمیشن آ چٹھی راہی کننگ غیرآئینی ءِ‘ صدر عارف علوی آئین آن چپ ءُ کاریم اس کرے و ارٹمیکو وار آئین ءِ پرغا۔ صدر مملکت غیرآئینی ءُ کاریم کپ۔ شہباز شریف پارے کہ صدر صوبہ غاتے ٹی گچین کاری تا تاریخ تننگ کپک۔ صدر پاکستان آ چٹھی راہی کیوہ‘ اونا حرکت آک غیرآئینی ءُ‘ صدر 9 تُو مست ہم غیر آئینی ءُ حرکت اس کریسس۔ او پارے کہ آئی ایم ایف تون کل باندات آک گڈیکو ریسہ ٹی ءُ۔ اسٹاف لیول مذاکرات اٹ آئی ایم ایف ناکل شڑت آتے پورو کننگانے‘ اومیت کینہ کہ بروک آ منہ دے اٹ معاہدہ پک کننگک۔ آئی ایم ایف معاہدہ غان مشکل آک بریرہ‘ سبسڈی تے کم کرفینن۔ وزیراعظم پارے کہ گچین کاری کرفنگ الیکشن کمیشن نا کاریم ءِ‘ الیکشن کمیشن وتواجہ ءُ ادارہ سے۔ الیکشن کمیشن انت کہ فیصلہ کرے حکومت عمل کیک۔ شہباز شریف مستی پارے کہ پی ٹی آئی نا جیل بھرو تحریک بے سہب مسنے‘ الس بے چیٹی تالان کننگ نا سیاست ءِ مسترد کرینے‘ الس ءِ تحریک انصاف نا یوٹرن تا سماءِ۔

(آن لائن)