اسپیشل بندغ آک راج انا شرفمند آ بندغ آک ءُ، ڈی سی خضدار

خضدار: ڈپٹی کمشنر خضدار میجر ریٹائرڈ محمد الیاس کبزئی پارینے کہ اسپیشل آ بندغ آک دا راج انا قابل احترام ءُ بندغ ءُ۔ اوفتا اُست بڈی ءِ کننگ اوفتے احساس کمتری آن کشنگ ضلعی انتظامیہ نا اولیکو زمواری ءِ۔ دا بابت اٹ ننا اوڑتون وخت وخت آ میٹنگ مرسا کیک و اوفتے ایلو بندغ آتا وڑاٹ مون آ اتنگ ءِ المی تکنہ۔ معذور بندغ آتیکن حکومت نا طے کروک آ پالیسی نا رداٹ فلاح وبہبود و اوفتے آسراتی تننگ کن گام گیج کننگ انگ ءِ و کوشست ءِ کہ ضابطہ نا رداٹ معذور آ بندغ آتا ہر کہول آ اُست بڈی ءِ کننگے۔ دا خیال آتا درشانی ءِ او گورنمنٹ محکمہ جات و معذور آ بندغ آتا اواری دیوان آن تران کرسا کرے۔ دیوان اٹ اے ڈی سی جی سراج بلوچ پی ایس ٹو ڈی سی مراد گزوزئی مزدور اتحاد نا چیئرمین صابرحسین قلندرانی معذور افراد نا نمائندہ حافظ عبدالرازق شاہوانی و محکمہ سوشل ویلفیئر محکمہ زکواۃ افسر و محکمہ خزانہ نا افسر ساڑی ئس۔ دیوان اٹ معذور بندغ آک تینا جتا کروک آ ڈغار نا خواست ڈپٹی کمشنر خضدار نا مون آ تخا۔ ڈپٹی کمشنر خضدار محمد الیاس کبزئی دیوان اٹ اوفتے کانودی وڑ و ڈول آن معلومدار کرے و ہرا معاملات ضلعی انتظامیہ نا ءُ دا بابت اٹ ڈپٹی کمشنر خضدار تینا کنڈآن جوان کمک ءِ کرے۔ ڈپٹی کمشنر خضدار میجر ریٹائرڈ محمد الیاس کبزئی نا پاننگ ئس کہ معذور آ بندغ آتے اوفتا کوٹہ نا حساب اٹ کل بشخ آتیٹی بشخندار کننگ کن تینا کوشست آتیا کاریم کننگ اٹی ءُ۔ و ہراڑے ویل مریک و اوفتون تولسا ہیت و گپ انا کمک اٹ ایسر کننگک و آخبت اٹ ہم داوڑ نا معذور بندغ آتا کماشی ءِ برجا سلک و اوفتا ویل آتا ایسری کن گام گیج کننگک۔ او پارینے کہ خدو نا نوکاپ نا وخت آ ضلعی انتظامیہ معذور آ بندغ آتون تینا کمک ءِ برجا تخا۔

(خ ن)