نیشنل پارٹی و بی ایس او نا کنڈ آن سانحہ بارکھان نا برخلاف ریلی

نوشکے : نیشنل پارٹی بی ایس او پجار نا کنڈآن سانحہ بارکھان نا برخلاف اسہ برانزی ریلی اس آفس آن پیش تمسا جتا جتا کسر تیان مرسا گل خان نصیر چوک آ برانزی جلسہ نا وڑاٹ مس۔ برانزی تیان نیشنل پارٹی نا صوبائی جنرل سیکرٹری خیر بخش بلوچ رخشان ریجنل سیکرٹری فاروق بلوچ جنرل سیکرٹری بیبرگ بلوچ یوتھ سیکرٹری آغا داود شاہ بی ایس او پجار نا زونل صدر مشتاق بلوچ سی سی ممبر آغا حق نواز شاہ سینیئر راہشون مجیب بلوچ امیر محمد حسنی نثار بلوچ اسک تران کرسا پاریر کہ سانحہ بارکھان بلوچی روایت و اسلامی اقتدار نا برخلاف ءُ۔ انتئے کہ اسہ ظالم جبر سردار ہرا تینا پرائیویٹ ءُ جیل اس جوڑ کرسا ظلم کننگ اٹی ءِ۔ کیہی سال آتیان او خان محمد مری تون اوار کیہی ہندن ءُ خوہت ءُ کہ اوفک دا نام نہاد سردار نا پرائیویٹ آ جیل آتیٹی بند و بیدادی نا زند اس تدیفنگ اٹی ءُ و دا سردار ءِ حکومت بلوچستان و نام نہاد سرکاری سردار آتا مخ تفی دوئی ءِ۔ اُلس برانز کننگ اٹی ءِ ولے ڈمی صوبائی حکومت زہمی آ خاہوت نا جاگہ غا انصاف تننگ و تینا چیلا غا سردار ءِ جتا جتا بابت اٹ رکھ فراوان کننگ اٹی ءِ۔ دا ظلم و جبر انا برخلاف نام نہاد سردار آک چُپ ءُ۔ گڑاس سیاسی ایکٹر بیرہ لوز آتسکان تالان ءُ۔ اوفک دا ظلم انا بربریت نا برخلاف ہیت و اوفتا ہلنگ آن خلیرہ اوفک ہم دا ظلم جبر اٹ بریبر نا بشخندار ءُ۔ ولے نیشنل پارٹی ہر وخت داوڑ نا دوبہ غاتا برخلاف توار چست کرینے و بحیثیت قومی پارٹی تینا فرض ءِ پورو کیک۔ داکان بیدس سانحہ بارکھان نا برخلاف اینو پنجگور اٹ ہم نیشنل پارٹی سول سوسائٹی بی ایس او پجار نا کنڈآن اسہ برانزی ریلی اس کشنگا۔ برانزی ریلی نیشنل پارٹی نا ضلعی دفتر آن پیش تمسا جتا جتا شاہراہ و اہم انگا مارکیٹ آتیان گدرینگسا نیشنل پریس کلب نا مون آ مچ مرسا جلسہ نا وڑاٹ مس۔ برانزیک سانحہ بارکھان نا خونی تا دزگیری و خاہوت آتے انصاف نا حق اٹ تینا دوتیٹی پلے کارڈ ہم ہرفیسر۔ ریلی نا کماش نیشنل پارٹی نا ضلعی صدر حاجی صالح بلوچ مرکزی ڈپٹی سیکرٹری پھلیں بلوچ ایڈوکیٹ علاالدین بلوچ سول سوسائٹی نا کنوینیر صمد صادق بی ایس او پجار نا صدر عامر بلوچ مری قبیلہ نا شاہنواز مری و ایلوفک کریر۔

(آن لائن)