پی سی بی انگلینڈ ءِ اینخو پاکستان نا دورہ ءِ کننگ آ راضی کے‘راشد لطیف

لاہور (مانیٹرنگ ڈیسک) مسکوہی قومی کیپٹن راشد لطیف پی سی بی ءِ سلا تسنے کہ او ٹی ٹونٹی ورلڈ کپ ءِ کینسل کننگ آن پد اینخو دوئی مروک آ ونڈو نا رداٹ انگلش ٹیم ءِ پاکستان آ بننگ آ تیار کننگے۔ 51 سال نا مسکوہی وکٹ کیپر گوازی گر پارینے کہ سخت انگا حالیت آتیٹی پاکستان ای سی بی نا کمک کن انگلینڈ آ ہننگ نا فیصلہ ءِ کرے وخت اس کہ انگلینڈ ءِ راضی کننگے کہ او مسہ میچ آتا سیریز کن ستمبر و اکتوبر اٹ پاکستان آ برے و ای سی بی کمامدار آک آسٹریلیا نا برخلاف ٹی 20 فارمیٹ نا سیریز آن پد تینا ٹیم ءِ ہفتہ سے کن پاکستان آ راہی کننگ کیک۔ یات سلے کہ پاکستان ٹیم غیر معمولی حالیت آتیٹی دا وخت آ انگلینڈ اٹ ساڑی ءِ ہراڑے کورونا وائرس نا سوب آن ہزار آ بندگ آک مرک انا گواچی مسنو، انگلینڈ اینڈ ویلز کرکٹ بورڈ دورہ کن پاکستان کرکٹ ٹیم نا 29 گوازی گرک و 14 آفیشل آتے بٹنگ انگانے۔ وخت اس کہ دورہ انگلینڈ ءِ پاکستان کرکٹ ٹیم نا ڈاکٹر سہیل سلیم ہائی رسک پن کرینے۔ بائیو سیکیور چاگڑد اٹ انگلینڈ اینڈ ویلز کرکٹ بورڈ نا کنڈآن قومی ٹیم نا گوازی گر تیکن دورہ نا ایکریڈٹیشن کارڈ تون اسہ پین کارڈ اس جاری کرینے۔ گوازی گرتے پارت کرینے کہ ہر وخت آ تینا ایکریڈٹیشن کارڈ تون اوار ایلو کارڈ ءِ تخے، حوال نا رداٹ ارٹمیکو کارڈ نا مسخت گوازی گرتا دانگ اینگ ہننگ بننگ آ نظر تخوئیءِ۔