کوئٹہ ٹی روچہ نا اولیکو دے گیس پریشر اٹ کمتی، مخلوق خوار

کوئٹہ : صوبائی درالحکومت کوئٹہ ٹی اولیکو روچہ ٹی گیس پریشر اٹ کمی و بندی نا سوب آن نیاڑی تے سہور و باہ ملنگ نا وخت آ ارغ کننگ اٹ کیہی ویل آتے مون تروئی تما۔ کوئٹہ نا علاقہ کاسی روڈ، نیچاری روڈ، جیل روڈ، ہدہ، رند سٹریٹ جناح ٹاؤن، نواں کلی، تون اوار ایلو علاقہ غاتیٹی اولیکو روچہ ٹی سہور و باہ ملنگ نا وخت آ خانہ داری ٹی اختہ نیاڑی تے گیس انا بندی و پریشر اٹ کمتی نا سوب آن ویل آتون مون آ تروئی تما۔ وخت اس کہ سوئی سدرن گیس کمپنی و ایلو کمامدار آتا کنڈآن رمضان المبارک اٹی سہور و باہ ملنگ نا وخت آ بجلی اوع گیس نا لوڈ شیڈنگ کپننگ نا پڑو ءِ کریسس۔ ولے داڑا عملدرآمد کتو۔ اولیکو روچہ ٹی گیس کمامدار آتا غلط حکمت عملی و عدم توجہی نا سوب آن شار انا جتاجتا علاقہ غاتیٹی سہور نا وخت آ جتا جتا علاقہ غاتیٹی گیس انا مفننگ نا غاوک بنا مسر۔ نیاڑی تے خانہ داری ٹی گیس مفننگ نا سوب آن ویل آک دوئی مننگ اٹی ءِ۔ اُلسی حلقہ غاک حکومت و سوئی سدرن گیس کمپنی نا کمامدار آتیان خواست کرے کہ رمضان المبارک نا بابرکت تو اٹ سہور و باہ ملنگ نا وخت آ گیس انا فراوانی پریشر تون پک کے۔ تانکہ نیاڑی تے روچہ توروک آتیکن سہور و با ملنگ نا وخت اٹ ارغ کننگ اٹ دوئی آ ویل آتیان خلاسی دوئی مریر۔ کوئٹہ ٹی یخ اتون اوار اوار تو باسنی نا مد اٹ ہم گیس پریشر اٹ کمتی و معطلی تواتر تون مننگ اٹی ءِ۔

(آن لائن)