آئین کل آن ایڑتر، کانود آن کس بڑز اف، شہباز شریف

تھرپارکر : وزیراعظم محمد شہباز شریف پارینے کہ تھرانا کرک اینو مچ آ پاکستان کن روشنائی تالان کننگ ءِ و پاکستان نا شونداری و شونہالی نا وت جوڑ مننگ ءِ، کشت وکشار، ٹیکنالوجی، واپار، زرکاری و اکنامک زون تا جوڑ کننگ سی پیک نا بروک آ ریسہ ءِ ہرادے داسہ مون آ دننگ نا وخت بسنے، سیوتی حکومت اواری اٹ پاکستان ءِ سختی تیان کشک، پاکستان نا شونداری نا دشمن و بدخواہ تے بوز اٹ کنوئی تمک، آئین پاکستان ننا غٹ اکن مقدم ءِ، پاکستان نا فائدہ کن ننے تینا ذات ءِ قربان کروئی تمے تو دا ہچ ءُ قربانی اس اف، کس اس کانود و آئین آن ایڑتر اف، کس اس دا ملک انا تہٹی دہشت گرد آتے پناہ تننگ کپک، دہشت گرد آتے اسپر کننگ سگ آن پیشن ءِ دانا موکل تننپگک۔ او چارشنبے نادے آ تھراٹی ہندی کولاآن چلینگوک آ توانائی نا 2ڈٹ آتا بنائی دود آن تران کریکہ۔ داوخت آ وزیراعلیٰ سندھ سید مراد علی شاہ، وزیر خارجہ بلاول بھٹو زرداری، بنجائی وزیر احسن اقبال، چوہدری سالک حسین، انجینئر خرم دستگیر، مریم اورنگزیب، چینی نائب ناظم الامور پانگ چن شوئی، سندھ انا وزیر توانائی امتیاز شیخ و پاکستانی و چینی کمپنی تا کمامدارآک ہم ساڑی ئسر۔ وزیراعظم پارے کہ اینو مچ آ پاکستان کن دا خوشی نا دے اسے کہ اینو تھر انا کرک اٹی پین خواری و دے و نن کوشست آتیان 330 میگاواٹ نا اسہ ڈٹ تھل نوووا تھر و 1320 میگاواٹ نا اسہ پین ڈٹ شنگھائی الیکٹرک ہرا تھرکول بلاک تون گنڈوک ءِ، نا اینو بنامسنے، داکان بیدس کولاکشنگ نا اسہ پین ڈٹ اسے نا ہم بناءِ کرینے، وزیراعظم پارے کہ تھر اسہ کرک اس ئس و کرک نوردی آن بیدس داڑے ریک انا ٹیلہ ئس و داکان بیدس ہچ اس الوکہ، دہائی تا مربوط ڈٹ بندی و حکمت عملی نا سوب آن اینو دا صحراصنعت و حرفت اٹ بدل مسنے، ریکی آ میدان داڑے اینو ہزار آ میگاواٹ بجلی ودی کننگ ءِ ہرانا روشنائی مچ آ پاکستان اٹ تالان مننگ ءِ ود اکرک مچ آ پاکستان نا شونداری و شونہالی نا سوب جوڑ مننگ ءِ۔ اوپارے کہ ہرافک اینو دا پاننگ ءُ کہ کولا نا بنداو آ بجلی جوڑ مف اوفک پاکستان نا شونداری و شونہالی نامخالف ءُ، تھرکولانا کوڑی تے اللہ تعالیٰ ننے ٹیکی نا وڑاٹ تسنے و 100 سال اسکان درکار کوڑی داڑے ساڑی ءِ ہرا ہزار آ میگاواٹ بجلی ودی کننگ کیک۔ اوپارے کہ ہرا 2200 میگاواٹ بجلی داڑے جوڑ کننگ انگ ءِ اگہ ہندا بجلی درآمد شدہ کولا نا بنداو آ جوڑ کننگے تو ارب آ ڈالر نا کولانا درآمد آ خڑچ مریک اونامقابلہ ٹی اللہ تعالیٰ ننے ہندی کولانا دروشم اٹ ہرا ٹیکی ءِ تسنے اگہ اودے کاریم اٹ اتنگ انگ ءِ و پین اتنگک تو ارب آڈالر نا کولادرآمد کروئی تمپک و داڑے ہر کنڈآ شونہالی نظربریک و دا کرک شونداری، کارخانہ و صنعت نا وت جوڑ مریک و الس ءِ روزگار ملک۔ وزیراعظم پارے کہ کراچی اسہ کٹیائی ءُ شار اسے و مہالو آن سندھ و پاکستان نا شونداری ٹی بھاز ہم کڑد ادا کننگ ءِ، تھر اٹی شونداری و شونہالی نا ہرا عظیم ڈٹ بناکرینے دا پاکستان نا شونداری، زرگزران و شونہالی ٹی بروک آ سال تیٹی بے پناہ سوگوی ایتک۔ کس اس دا ملک اٹی دہشت گرد آتے پناہ تننگ کپک، تدوک آ دے پاکستان نا فوج انا آفیسر آک شہید مسنو و دا شہیدی نا داستان کیہی دہائی تیا تالان ءِ و اگہ داسہ نن دا دہشت گرد آتے پناہ ایتن و اوفتے شیلڈ کین داناقابل سگ ءِ، دا ممکن اف و دانا موکل تننگ مفک۔ داکان مست وزیراعظم مٹھی ٹی 330 میگاواٹ تھل نوواتھر پاور پلانٹ نا بناءِ کرے و ڈٹ آ کاریم کروک آ انجینئر آتون اوڑدہی کرے۔ وزیراعظم تھراٹی 1320 میگاواٹ نا شنگھائی الیکٹرک پاور پلانٹ ڈٹ انا ہم بناءِ کرے۔ داوخت آ او پلانٹ نا چندی بشخ آتا معائنہ ءِ ہم کرے۔ وزیراعظم ءِ تھربلاک ون مائن آن کولانا فراوانی، بوائلرز، کولنگ ٹاورآتا بارواٹی حوال ہم تننگا۔

(اے پی پی)