یوم پاکستان اینو قومی جم و جوش اٹ شان و شرف اٹ اڈ تننگک

اسلام آباد : 82 می یوم پاکستان اینو سَے شنبے نا دے قومی جم وجوش اٹ شان وشرف اٹ اڈ تننگک‘ دا دے انا رد اٹ مچ آ ملک اٹ لس چھٹی مریک‘ مچ آملک اٹ کورونا ایس اوز پی تیا عمل کرسا دود اڈ تننگک‘ غٹ سرکاری و نجی ماڑی تیا قومی بیرک چست کننگک۔23مارچ انا بنا بنجائی دارالحکومت اٹ 31وخت اس کہ صوبائی دارالحکومت آتے ٹی 21،21 توپ آتا سلامی آن مریک‘ سہب انا نماز اٹ ملک وملت نا سلامتی وسوگوی کن خصوصی دعا کننگک‘ دا دے انا بابت اخبارک خصوصی ایڈیشن شینک کیرہ‘ وخت اس کہ ریڈیو پاکستان، پی ٹی وی و نجی ٹی وی چینل تیان ہم خصوصی دستاویزی پروگرام نشر کننگک ہرافتے ٹی یوم پاکستان نا اہمیت ءِ پاش کننگک‘ کراچی ٹی بابائے قوم قائد اعظم محمد علی جناح و لاہور اٹ شاعر مشرق سر علامہ اقبال نا مزار تیا گارڈ آتا بدلی نا دود اڈ تننگک۔ 23مارچ یوم پاکستان نا وخت آ مچ آ ملک اٹ لس چھٹی مریک‘ غٹ سرکاری ونجی ادارہ غاک بند مریرہ‘ یوم پاکستان نا رد اٹ 23 مارچ سَے شنبے نادے مچ آ ملک انا غٹ تعلیمی سرکاری و نجی ادارہ غاک بند مریرہ۔

(آن لائن)