بلوچستان ہائی کورٹ نا جعلی ڈومیسائل نا بابت جاست پاست نا پارت
کوئٹہ ( آن لائن ) بلوچستان ہائی کورٹ نا چیف جسٹس جسٹس جمال خان مندوخیل و جسٹس جسٹس نذیراحمد لانگو استا ڈویژنل بینچ جعلی ڈومیسائل نا بابت جعل سازی نا بابت ساف جاست و پاست کننگ نا پارت کرسا ریمارکس تس کہ لوکل /ڈومیسائل نا بابت انکوائری تون اوار کانودی سازی کننگے تانکہ اُلس نا سختی تیٹی کمتی برے و کس اسے نا حق تلفی مف۔ دا ریمارکس آتے بینچ انا جج آک تدوک آ دے بلوچستان اٹ جعلی ڈومیسائل آتا جاری کننگ نا بابت دائر کیس نا سماعت نا وخت آ تس۔ سماعت نا وخت آ درخواست گزار عبدالباسط ایڈووکیٹ، ایڈیشنل سیکرٹری داخلہ حافظ عبدالباسط ،ایڈووکیٹ جنرل ارباب طاہر ایڈووکیٹ و ایلوفک عدالت اٹ پیش مسر۔ سماعت اٹی ایڈووکیٹ جنرل ارباب طاہر ایڈووکیٹ عدالت ءِ پارے کہ حکومت بلوچستان نا کنڈآن جعلی ڈومیسائل نا بابت جاست و پاست کننگ انگ ءِ، ننا کوشست ءِ کہ معاملہ نا جوان وڑاٹ جاست و پاست مرے او وخت آ چیف جسٹس ریمارکس تس کہ صوبائی حکومت بلوچستان اٹ جعلی ڈومیسائل نا بات ساف انکوائری بایدے مرے وخت اس کہ حکومت انکوائری تون اوار اوار کانودی سازی ہم کرے تانکہ کس اسے نا حق تلفی مف و اُلس نا ویل آتیٹی کمتی برے۔ جسٹس جمال مندوخیل ایڈیشنل سیکرٹری داخلہ ءِ پارت کرے کہ لوکل ڈومیسائل نا جاری کننگ نا مکمل انکوائری ءِ کرفنگے او دا کاریم اخس زوت اس مرے جوان ءِ تانکہ ننا تحفظات آک مر مریر، اوکان گڈ عدالت کیس انا سماعت ءِ عئید آن پد اسکان کینسل کرے۔