کم آب کنوئی گڑا بہا کننگ آ ک ارروائی، کیہی دکاندار تیا ڈنڈ بیٹ

کوئٹہ : بے آب کن خور نا گڑاتا تیاری و بہا نا برخلاف بلوچستان فوڈ اتھارٹی نا برجا انگا کارروائی تیٹی ضلع لورالائی ٹی 9 وخت اس کہ کوئٹہ ٹی 3 جاگہ غا ڈنڈ خلنگانے۔ حوال نا رداٹ ڈویڑنل ڈائریکٹر شراف الدین نا کماشی ٹی بی ایف اے انسپیکشن ٹیم صدر بازار و ڑوب روڈ آ جوڑ انگا بنجاہ تا چیکنگ ءِ کرسا کانود نا خلاف ورزی آ 3 میٹ شاپس، 4 جنرل اسٹورز، 1 بیکری و 1 ملک شاپ اسے آ ڈنڈ خلک۔ سو انا دکان تا برخلاف خراب سفائی و دکان تا مون آ لوڑ و دنز اٹ سو تے ٹنگنگ آ ایکشن ہلنگا۔ وخت اس کہ جنرل اسٹور آتیان غیرکانودی چائنیز بے و معیاد ہنوک آ گڑاتے (پیکٹ مصالحہ، ٹکی ٹافی) دوئی مس۔ ہرافتے ضبط کرسا اوکان گڈ زیان کننگا۔ ملک شاپ آتیان سیمپل ہلسا وخت آ ٹیسٹ کننگا۔ ٹیسٹ کننگ آ 1 دکان نا پال تے اوار سوار کننگا۔ بیکری ءِ لائسنس آتا مفننگ، سفائی نا جوان حالیت و ورکر آتا جندی سفائی ہیڈ کور، ماسک و دستانہ مفننگ آ ڈنڈ کرے۔ بی ایف اے ڈویڑنل ٹیم دوران انسپیکشن معمولی نقص آ 7 ایلو کن خور نا ہند آتے اصلاحی نوٹس آتے جاری کرے۔ اوکان گڈ ملک شاپ، ڈیری فارم و ہوٹل آتیٹی پال آتون اوار جتا جتا ڈیری پراڈکٹس آتے پاش کننگ کن بلوچستان فوڈ اتھارٹی نا کنڈآن ہند آتا انسپیکشن آتا چر ہم برجا سلیس۔ پال اٹ اوار سوار آ جناح ٹاؤن و پشین اسٹاپ اٹ 3 ملک شاپ آتا برخلاف کارروائی کرے۔ بی ایف اے نا خاص انگا ملک سیفٹی ٹیم کیہی ہند (ہوٹل، ملک شاپ) آتون پال انا سمپل ہلسا موبائل لیبارٹری نا ساڑی ٹیسٹنگ گڑاتا کمک اٹ چیک کرے۔ لیب رپورٹ آتا رداٹ وخت آ ٹیسٹ کردہ نمونہ غاتیا 3 ہند آتا پال دیر انا کچ و خشک پال انا اوار سوار پاش کرے۔

(خ ن)